Berita pasal Jeriko ngelekai ngagai nengeri bukai ba menua Kanaan. Raja ari nengeri bukai ngaga pemutus deka ngelaban orang Israel. Tang orang Gibeon bisi pelan bukai. Ngena gari ti luya, sida mansang ngagai Josua lalu bejaku: ‘Kami tu datai ari menua jauh. Kami udah ninga pasal Jehovah, pasal semua utai ti udah dikereja Iya ke kita ba menua Ejip enggau Moap. Besemaya meh enda nyerang kami, lalu kami deka nyadi ulun kita.’

Josua pechayaka sida lalu setuju enda nyerang sida. Tiga hari udah nya, Josua nyau nemu orang Gibeon ukai ari menua jauh. Sida ari menua Kanaan. Josua nanya orang Gibeon: ‘Nama kebuah kita bulaka kami?’ Sida nyaut: ‘Kami takutka kita! Kami nemu Petara kita Jehovah belaban ngarika kita. Tulung anang munuh kami.’ Josua ngamatka semaya iya lalu nejuka sida idup.

Enda lama udah nya, lima iku raja orang Kanaan enggau bala soldadu sida ngemba orang Gibeon. Josua enggau bala soldadu iya  bejalai semalam-malam deka nyelamatka orang Gibeon. Tumu pagi hari siti sida berengkah beperang. Orang Kanaan ngachir ngerarika diri. Jehovah ngasuh ujan batu besai ninggang sida enda ngira dini sida ngerarika diri. Josua lalu minta Jehovah ngasuh mata panas enda bekinsit. Nama kebuah Josua minta Jehovah ngereja nya taja pan utai nya nadai kala nyadi? Laban Josua arapka Jehovah. Mata panas enda nginsit sepemanjai hari nyentukka orang Israel ngalahka bala raja Kanaan enggau soldadu sida.