Wankebʼ jalan chik li tenamit re Canaan li keʼxnaw li kixkʼul Jerico. Ebʼ li awabʼej rehebʼ li tenamit aʼin keʼxjunaji ribʼ re pleetik saʼ xbʼeenebʼ laj Israel. Abʼan ebʼ laj Gabaon keʼxkʼoxla xbʼaanunkil jun li naʼlebʼ. Keʼxkʼe pejel tʼikr chirixebʼ, xkohebʼ chi rilbʼal laj Josue ut koleʼxye re: «Najt nokoochalk. Qabʼihom chirix li Jehobʼa ut li xbʼaanu chaq cheerix saʼ Egipto ut saʼ Moab. Wi nekeeye naq inkʼaʼ texpleetiq saʼ qabʼeen, tookanaaq choʼq eemoos».

Laj Josue kixpaabʼ rehebʼ ut kixye rehebʼ naq inkʼaʼ teʼpleetiq saʼ xbʼeenebʼ. Abʼan oxibʼ kutan xnumik aʼin naq laj Josue kixnaw naq ebʼ laj Gabaon moko najt ta nekeʼchalk, ebʼ aj Canaan peʼ. Joʼkan naq laj Josue kixpatzʼ rehebʼ: «Kʼaʼut xooʼeetikʼtiʼi?». Aʼanebʼ keʼxye: «Xbʼaan naq xooxuwak. Naqanaw naq li Jehobʼa Leeyos napleetik cheerix. Bʼaanumaq usilal mooʼeekamsi». Laj Josue kixbʼaanu li kixye ut maakʼaʼ kixbʼaanu rehebʼ.

Moko naabʼal kutan ta xnumik naq oobʼ li awabʼej re Canaan rochbʼenebʼ laj puubʼ xkohebʼ chi pleetik saʼ xbʼeenebʼ laj  Gabaon. Laj Josue ut ebʼ laj puubʼ keʼbʼeek chi tzol chixjunil li qʼoqyink re xkolbʼalebʼ chaq laj Gabaon. Wulajaq chik, toj eqʼla chiʼus, kitiklaak li yalok u. Ebʼ laj Canaan yalaq bʼar keʼxkuji ribʼ re elelik, abʼan li Jehobʼa kixbʼaanu naq ttʼaneʼq ninqi saqbʼach saʼ xbʼeenebʼ. Tojaʼ naq laj Josue kixtzʼaama re li Jehobʼa naq li saqʼe inkʼaʼ t-ekʼanq saʼ xnaʼaj. Maajunwa xkanajik li saqʼe chi joʼkan. Kʼaʼut laj Josue kixpatzʼ aʼin? Xbʼaan naq jwal kʼojkʼo xchʼool rikʼin li Jehobʼa. Joʼkan naq li saqʼe moko kimoyk ta ru. Saʼ li kutan aʼin inkʼaʼ kiqʼoqyinoʼk toj reetal naq ebʼ laj Israel keʼxqʼax ru ebʼ li awabʼej re Canaan ut ebʼ laj puubʼ.