Ũhoro wa kũniinwo gwa itũũra rĩa Jeriko nĩ wakinyire matũũra-inĩ macio mangĩ ma Kanaani. Athamaki a kuo nĩ maacokanĩrĩire hamwe nĩguo mathiĩ magatharĩkĩre Aisiraeli. No agibeoni maabangire ũndũ ngũrani na ũcio. Maathire kũrĩ Joshua mekĩrĩte nguo ndarũku na makĩmwĩra: ‘Tumĩte bũrũri wa kũraihu. Nĩ tũiguĩte ũhoro wa Jehova na ũrĩa wothe eekire Misiri na Moabi. Twamũthaitha mwĩhĩte atĩ mũtigatũtharĩkĩra, na ithuĩ nĩ tũgũtuĩka ngombo cianyu.’

Joshua nĩ aametĩkirie na akĩmeera atĩ ndakamatharĩkĩra. No thutha wa thikũ ithatũ nĩ aamenyire atĩ matioimĩte kũraihu tondũ moimĩte Kanaani. Joshua aamoririe ũũ: ‘Mũratũhenirie nĩkĩ?’ Nao magĩcokia: ‘Tũraarĩ na guoya! Nĩ tũĩ atĩ Jehova Ngai wanyu nĩ aramũrũĩrĩra. Twamũthaitha mũtigatũũrage.’ Joshua ndacenjirie ũrĩa maarĩkanĩire na ndaamekire ũũru.

Thutha wa ihinda inini, athamaki atano a Kanaani o hamwe na thigari ciao nĩ maabangire gũtharĩkĩra Agibeoni.  Joshua na thigari ciake maaraire magĩthiĩ ũtukũ mũgima nĩguo makamahonokie. Maambĩrĩirie mbaara rũcinĩ tene mũthenya ũrĩa warũmĩrĩire. Akanaani maambĩrĩirie kũũra marorete na mĩena yothe. Kũrĩa guothe mooragĩra, Jehova nĩ aamagũithĩirie mahiga manene ma mbura ya mbembe. Joshua aacokire akĩra Jehova areke riũa rĩrũgame. Nĩ kĩĩ gĩatũmire eere Jehova eke ũguo na mbere ĩyo gũtirĩ hĩndĩ riũa rĩoimĩte rĩrũgamĩte? Nĩ tondũ nĩ eehokete Jehova. Riũa rĩtiathũire mũthenya wothe nginya rĩrĩa Aisiraeli maahootire athamaki a Kanaani na thigari ciao.