Onghundana i na sha naJeriko oya li ya tandavela fiyo okoiwana yomuKanaan. Eehamba dayo oda li da tokola okulongela kumwe opo di lwife Ovaisrael. Ashike Ovagibeon ova li va diladila po oshinima shi lili. Ova li va ya kuJosua va djala oikutu ya kulupa ndele tava ti: ‘Otwa dja koshilongo shokokule. Otwa uda kombinga yaJehova naashishe osho e mu ningila muEgipti nomuMoab. Tu udanekela uhe tu ponokele noha tu ka ninga ovapiya voye.’

Josua okwa li a itavela osho va popya ndele ta dimine ehe va ponokele. Konima yomafiku atatu, okwa li e shi mona mo kutya inava dja koshilongo shokokule. Ova li ashike va dja muKanaan. Josua okwa pula Ovagibeon ta ti: ‘Omolwashike mwe tu lombwela oipupulu?’ Opo nee ova nyamukula tava ti: ‘Otwa li twa tila unene. Otu shi shii kutya Jehova Kalunga keni oku li pamwe nanye. Alikana inamu tu dipaa.’ Josua okwa li a wanifa po eudaneko laye noku va efa va kale nomwenyo.

Mokweendela ko kwefimbo, eehamba nhano dOvakanaan nomatangakwaita ado okwa li a hovela okutilifa Ovagibeon. Josua  netangakwaita laye ova li oupafi oufiku aushe opo ve va xupife. Olwoodi ola ka hovela ongula inene. Ovakanaan ova li va tameka okufaduka po va yuka keembinga adishe. Keshe oko kwa li va yuka, Jehova okwa li e va denga neemhawe dinene. Opo nee Josua okwa li a pula Jehova opo a kanghameke etango. Omolwashike a li e na okupula Jehova a kangheke etango ngeenge ke na efiku a monene etango la kanghama? Omolwaashi Josua okwa li e lineekela Jehova filufilu. Etango ola li la kanghama fiyo Ovaisrael va mana okufinda eehamba dOvakanaan nomatangakwaita ado.