Omwatsi owahambire oku Yeriko mwahika n’okwa bindi bihanda omwa Kanana. Abami babu mubathwamu erihindana haghuma erilhwa n’Abaisraeli. Aliwe Abagibeoni mubakolha ekindi kindu. Mubambalha esyongyimba esitamangukire, n’erighenda eyiri Yosua n’erimubwira bathi: ‘Thukalhua haali kutsibu. Muthw’owa oku Yehova kandi n’ebya abakolera e Misiri ne Moabu. Muthulhaghanisaye erithendi syathw’itha kandi thwasyabya baghombe benyu.’

Yosua mw’ikirirya n’eriligha erithendi b’itha. Enyuma w’ebiro bisathu, Yosua mwaminya ngoku sibalyalhua haali. Balhua imwa n’omwa kihugho kye Kanana. Yosua mwabulya Abagibeoni athi: ‘Busana naki mumwathuthebire?’ Mubasubirya bathi: ‘Thwabya thukwire obuba! Muthwaminya ngoku Yehova Nyamuhanga wenyu akabalhwira. Banithu muleke erithwitha.’ Yosua mwaberererya eriyilhagha liwe, mwabaleka.

Buthuku buke-buke, abami bathanu Abanya Kanana n’abasirikali babu mububahisya Abagibeoni. Omw’ithumbi eryosi,  Yosua n’abasirikali biwe mubalyatha kutsibu eriyalhamya Abagibeoni. Amalhwa mwatsuka engyakya eyakwamako. Abanya Kanana mubathibitha kithya-kithya. Ehosi-hosi eya banathibitha, Yehova mwab’itha omwa mathwa manene-manene. Neryo Yosua mwasaba Yehova athi eryuba libye irin’imene. Busana naki mwasaba Yehova y’ekyo kandi nibya isikirikyathabya? Kundi Yosua abya ayikethere Yehova. Eryuba mulithalenga habw’ekiro kyosi erihika aho Abaisraeli bakindira abami b’Ekanana n’abasirikali babu.