Ɔda neshɔn dɛn na Kenan yɛri bɔt wetin apin na Jɛriko. Dɛn kiŋ dɛn bin disayd fɔ kam togɛda fɔ fɛt di Izrɛlayt dɛn. Bɔt di Gibyɔnayt dɛn mek difrɛn plan. Dɛn wɛr chɛr chɛr klos dɛn, go to Jɔshwa ɛn tɛl am se: ‘Wi kɔmɔt fa say. Wi dɔn yɛri bɔt Jiova ɛn ɔl wetin i dɔn du fɔ una na Ijipt ɛn Moab. Prɔmis se una nɔ go atak wi, ɛn wi go bi una savant dɛn.’

Jɔshwa biliv dɛn, ɛn i gri se i nɔ go atak dɛn. Afta tri dez, i faynd awt se nɔto fa say dɛn kɔmɔt. Dɛn bin kɔmɔt na Kenan. Jɔshwa aks di Gibyɔnayt dɛn se: ‘Wetin mek una lay to wi?’ Dɛn ansa am se: ‘Wi bin de fred! Wi no se una Gɔd Jiova de fɛt fɔ una. Duya una nɔ kil wi.’ Jɔshwa kip in prɔmis ɛn i alaw dɛn fɔ liv.

I nɔ tu te, fayv Kenanayt kiŋ dɛn ɛn dɛn sojaman dɛn trɛtin di Gibyɔnayt dɛn. Jɔshwa ɛn in sojaman dɛn mach ol nɛt fɔ go sev dɛn. Dɛn bigin fɔ fɛt ali mɔnin di nɛks de. Di Kenanayt dɛn  bigin fɔ rɔn go difrɛn say dɛn. Ɛnisay we dɛn rɔn go, Jiova bin de mek big big ays blɔk we fiba ren fɔdɔm pan dɛn. Dɔn Jɔshwa bin aks Jiova fɔ mek di san tinap wanples. Wetin mek i bin aks Jiova fɔ du dat, we da kayn tin de nɔ bin dɔn ɛva apin yet? Na bikɔs Jɔshwa bin abop pan Jiova. Di san tinap wanples wan ol de te di Izrɛlayt dɛn win di Kenanayt kiŋ dɛn ɛn dɛn sojaman dɛn.