Mi yooŋgoo tiu silɔ o lɛŋnde Kenaŋndeŋ niŋ a nyɛ yɔŋnuŋ Chɛluiko wo okɔɔ. Mi masaa o chieeŋ bɛnduŋ cheleŋndoŋ niŋ duaŋ naapilɛ le Isɔluɛiya chɔulabaa. Mi Kibiɔnaitiiya tosa kɛɛsiaa teŋgeŋ cheleŋ. Ma wounuŋ nyɛla paandulaŋ, ma kua naa Chɔɔsuaa chua, ma dimul ndu aa: ‘Ŋ fula bɔɔ naa levil. Ŋ tuei a Chɛhowa okɔɔ, vɛlɛ a nyɛ o nyɛ o tosa le nya Ichipi, a Mowaabi. Chuel naa buŋgɛi maa la cho naa delɔɔ choo le, nduyɛ maa buɛiyaa nyaa naŋ cho wa ni.’

Mi Chɔɔsuaa laalaŋ nda, nduyɛ mbo chɛl maa a cho nda delɔɔ choo le. Palɛi i yaa okoŋ kɔɔli, mbo sina maa o cho naa levil te nda fula le. O lɛŋnde Kenaŋndeŋ niŋ nda fula ni. Mi Chɔɔsuaa nyuna Kibiɔnaitiiya aa: ‘Le yɛɛ nya dimullɛ naa choolaŋ?’ Ma muli aa: ‘Siooŋnde wa naa ni! Ŋ sina maa Chɛhowa Mɛlɛka nyaa cho chɔulabaa le nya ni. Yandii la dii naa le.’ Mi Chɔɔsuaa tosa nyɛ o dimul nda wo, okoŋ o dii lɛ nda le.

Nyɔɔ viu bɛɛ le, mi masaa a ŋuɛɛnu o lɛŋnde Kenaŋndeŋ niŋ, a puaa ndaa chɔuwa kɔŋgɔlaŋ Kibiɔnaitiiya. Mi Chɔɔsuaa  a puaa nduaa chɔuwa lɔl kɔlaŋ pii le nda piŋioo. Idiiyo pum mi sɔŋgaa kanduŋ. Mi Kenanaitiiya kandu nyaanɔŋndo ba o ba fee. Ba o ba nda nyaanuŋ pɛ, Chɛhowa tusi nda looŋ kpuŋgbaŋ choo. Mi Chɔɔsuaa piɛi o Chɛhowa lo le mbo tosa mi paaleŋ le sim yi. Kani bɛɛ paaleŋ lee sim ndɔ le. Mɛɛ le yɛɛ o nyuna yɛ Chɛhowa le mbo tosa mi paaleŋ le sim? Kanifuule, ndoo nɔ tiindaŋndo o Chɛhowa niŋ. Mi Mɛlɛka tosa mi paaleŋ le sim yi. Le lo isisi haaa mi Isɔluɛiya chii masaa Kenanaitiiya a puaa ndaa chɔuwa diu diu.