တၢ်မၤလိ ၃၁
စီၤယိၤၡူဒီးပှၤကံးဘိၣ်ဖိတဖၣ်
ပှၤအံၣ်စရ့လးဖိတဖၣ် ဒုးနၢၤဝဲဝ့ၢ်ယရံၤဃိန့ၣ် ဟူထီၣ်သါလီၤလၢ ကီၢ်ကနၤဧၣ်ဒီကီၢ်ညါလီၤ. ကီၢ်ကနၤဧၣ်အစီၤပၤတဖၣ် ဆၢတဲာ်လီၤအသးလၢ ကဒုးတၢ်ဒီးပှၤအံၣ်စရ့လးဖိလီၤ. ဘၣ်ဆၣ် ပှၤကံးဘိၣ်ဖိအတၢ်ထံၣ်န့ၣ် လီၤဆီဒီးပှၤကနၤဧၣ်အစီၤပၤတဖၣ် အတၢ်ထံၣ်လီၤ. ပှၤကံးဘိၣ်ဖိတဖၣ်လဲၤဝဲဆူ စီၤယိၤၡူအအိၣ်ဒီး ဟဲကူကၤဝဲ တၢ်ကူတၢ်ကၤလၢအလီၢ်လံၤလီၤ. ဒီးအဝဲသ့ၣ်တဲဝဲလၢ– ‘ပဟဲလၢထံကီၢ်လၢအယံၤတဘ့ၣ်လီၤ. ဖဲသုအိၣ်လၢကီၢ်အဲၤကူပတူးအပူၤ ဒီးဖဲသုဒုးတၢ်ဒီးပှၤမိၤအးဖိအခါ ယဟိဝၤယွၤမၤစၢၤသုန့ၣ် ပနၢ်ဟူဘၣ်လံ. အၢၣ်လီၤအီလီၤပှၤဒ်သိး သုသုတဒုးတၢ်ဒီးပှၤတဂ့ၤ, ဒီးပကကဲထီၣ် သုကုၢ်သုပှၤလီၤ.’
စီၤယိၤၡူနာ်ဝဲ ပှၤကံးဘိၣ်ဖိအတၢ်ကတိၤ ဒီးမၤတၢ်အၢၣ်လီၤအီလီၤလၢ တဒုးတၢ်ဒီးအဝဲသ့ၣ်ဘၣ်. ပူၤကွံာ်သၢသီဒီး စီၤယိၤၡူသ့ၣ်ညါဝဲလၢ အဝဲသ့ၣ်တဟဲလၢတၢ်လီၢ်လၢအယံၤဘၣ်. ပှၤကံးဘိၣ်ဖိတဖၣ်အံၤအိၣ်ဝဲ ဖဲကီၢ်ကနၤဧၣ်အပူၤလီၤ. စီၤယိၤၡူသံကွၢ်ဝဲပှၤကံးဘိၣ်ဖိလၢ– ‘ဘၣ်မနုၤအဃိ သုလံၣ်အီၣ်ပှၤလဲၣ်.’ အဝဲသ့ၣ်တဲဆၢက့ၤလၢ– ‘မ့ၢ်လၢပပျံၤတၢ်အဃိလီၤ. ပသ့ၣ်ညါလၢယဟိဝၤယွၤ လၢအမ့ၢ် သုကစၢ်ယွၤန့ၣ် ဒုးတၢ်လၢသုဂီၢ်လီၤ. ဝံသးစူၤမၤသံပှၤတဂ့ၤ.’ စီၤယိၤၡူတီဒီးအတၢ်အၢၣ်လီၤအဃိ တမၤသံ ပှၤကံးဘိၣ်ဖိတဖၣ်ဘၣ်.
တယံာ်တမီၢ်န့ၣ် ကီၢ်ကနၤဧၣ်အစီၤပၤယဲၢ်ဂၤ ပာ်ဖှိၣ်ထီၣ်အသးလၢ ကလဲၤဒုးဝဲပှၤကံးဘိၣ်ဖိတဖၣ်လီၤ. လၢတၢ်န့ၣ်အဃိ စီၤယိၤၡူဒီးအသုးဖိတဖၣ် လဲၤဝဲဒီတနၤကျၢၤဆူ ပှၤကံးဘိၣ်ဖိတဖၣ်အအိၣ် ဒ်သိးကဒုးစၢၤအဝဲသ့ၣ်အဂီၢ်လီၤ. တၢ်ဒုးစးထီၣ်ဝဲလၢခံတနံၤ ဖဲဂီၤခီဂီၤဂီၤအဆၢကတီၢ်န့ၣ်လီၤ. ခီဖျိလၢပှၤကနၤဧၣ်ဖိတဖၣ် ၡူဝဲအဃိအသုးဖိတဖၣ် ဃ့ၢ်ကွံာ်ဝဲတဂၤတပူၤတဂၤတပူၤလီၤ. ယဟိဝၤယွၤဒုးလီၤတဲာ်ဝဲသူၣ်ဖးဒိၣ်တဖၣ်လၢ ပှၤကနၤဧၣ်သုးဖိတဖၣ်အဖီခိၣ်လီၤ. ဝံၤဒီး စီၤယိၤၡူဃ့ဝဲလၢယဟိဝၤယွၤ ကဒုးအိၣ်ကတီၢ်မုၢ်လီၤ. လၢညါန့ၣ် မုၢ်တအိၣ်ကတီၢ်နီတဘျီဘၣ်. ဘၣ်မနုၤအဃိ စီၤယိၤၡူမၢယဟိဝၤယွၤ ဒုးအိၣ်ကတီၢ်မုၢ်လဲၣ်. ခီဖျိလၢ စီၤယိၤၡူနာ်ဝဲ ယဟိဝၤယွၤအဃိလီၤ. ဒီးမုၢ်အိၣ်ကတီၢ်ဝဲတုၤလီၤလၢ ပှၤအံၣ်စရ့လးဖိတဖၣ်ဒုးနၢၤဝဲ ကီၢ်ကနၤဧၣ်အစီၤပၤ ဒီးအသုးဖိတဖၣ်လီၤ.
“မ်သုကတိၤတၢ်လၢအမ့ၢ်, အမ့ၢ်, တမ့ၢ်ဘၣ်, တမ့ၢ်ဘၣ်, န့ၣ်တက့ၢ်. တၢ်အါန့ၢ်အန့ၣ်တဖၣ် ဟဲလၢ တၢ်အၢတၢ်သီအပူၤလီၤ.”—မးသဲ ၅:၃၇
