Kana tẽns a taabã wʋma bũmb ning sẽn maan Zeriko wã. B nanambsã yãka yam n na n naag taab n tɩ zab ne Israyɛll nebã. La Gabawõ nebã maana yam. B yãka neb tɩ b yeelg fu-kʋd sẽn pãrse, n kẽng a Zozuwe nengẽ n tɩ yeel yaa: ‘Tõnd yii tẽng sẽn zãre. Tõnd wʋmame tɩ b gom a Zeova yelle, la bũmb nins fãa a sẽn maan n kõ yãmb Ezɩpt la Moaab tẽnsẽ wã. Tõnd kotame tɩ y ra wa zab ne tõnd ye. La tõnd na n lebga yãmb tʋm-tʋmdba.’

A Zozuwe ra tẽedame tɩ b sẽn yeel tɩ b yita tẽng sẽn zãrã yaa sɩda, t’a yeel-b tɩ Israyɛll nebã pa na n zab ne-b ye. Rasem a tãab poore, a Zozuwe bãngame tɩ b yagame, la tɩ b wẽneg n bee Kana. A soka Gabawõ nebã yaa: ‘Bõe yĩng tɩ yãmb yag ziri?’ Tɩ b leoke: ‘Rabeemã yõka tõndo. Tõnd miime tɩ yãmb Wẽnnaam a Zeova zabdame n sõngd yãmba. Da kʋ-y tõnd ye.’ A Zozuwe maana wa a sẽn da yeelã, a pa kʋ-b me ye.

Kana nanambs a nu ne b sodaas n yik n na n tɩ zab ne Gabawõ rãmbã. A Zozuwe ne a sodaasã kẽna yʋng tõre,  n na n tɩ fãag Gabawõ nebã. B sɩnga zabrã yibeoogã pĩnda. Kana nebã ra zoet n teesda zĩig fãa. La b sẽn kẽngẽ fãa, a Zeova kɩtdame tɩ sa-pɩlem sẽn yaa bɛd-bɛd lʋɩ n kʋ-ba. A Zozuwe kosa a Zeova, t’a kɩt tɩ wĩntoogã yals n kaoos n pa yẽrg ye. Wĩntoogã ra zɩ n maan woto ye. La bõe yĩng t’a kos a Zeova t’a kɩt tɩ wĩntoogã yalse? Bala a ra teega a Zeova. Wĩntoogã yalsa daar tõre, hal tɩ Israyɛll nebã tõog Kana nanambsã la b sodaasã fãa.