Sekinok altepemej tlen Canaán kimatkej tlen panotoya ipan altepetl Jericó. Katli tlanauatiyayaj ipan nopa altepemej moiljuijkej mopaleuisej uan kinteuisej israeleuanij. Gabaóneuanij moiljuijkej kichiuasej seyok tlamantli. Mokentijkej ininyoyo tlen tsatsayakatok uan kiitatoj Josué, uan kiiljuijkej: “Tojuantij tlauel uejka tieuaj. Tijkaktokej tlen Jehová kichijtok uan kenijkatsa inmechmanauik ipan Egipto uan ipan Moab. Xitechiljuikaj amo intechteuisej, uan tojuantij tiinmechtekipanosej”.

Josué kinneltokak nopa tlakamej uan kiniljuik amo kinteuiskia. Ualuiptla, Josué kimatki nopa tlakamej eliyayaj canaáneuanij. Yeka Josué kintlajtlanilik: “¿Kenke intechkajkayajkej?”. Inijuantij kinankilijkej: “¡Pampa timajmauiyayaj! Tijmatij inmoTeotsij Jehová inmechpaleuia kema intlateuiaj. Yeka, tiinmechtlajtlaniaj, amo xitechmiktikaj”. Josué kichijki tlen kiniljuijtoya, uan amo tleno kinchiuilik.

Teipa, makuiltij tlanauatianij katli euayayaj Canaán uan inintlateuijkauaj, kinteuitoj gabaóneuanij. Yeka, Josué uan itlateuijkauaj kinmanauitoj. Seyoual nejnenkej, uan kema  tlaneski, pejkej kinteuiaj canaáneuanij. Maske canaáneuanij kinejkej mochololtisej, Jehová kichijki ma uetsi ininpani uejueyi tesiuitl. Teipa Josué kiiljuik Jehová ma kiketsa tonati. Nopa tonati amo kema moketstoya. ¿Kenke Josué kiiljuik ma kiketsa tonati? Pampa Josué motemachiyaya ipan Jehová. Nopa tonati amo kalajki. Ipan nopa tonali amo tlatlayouixki, kiampa israeleuanij kintlankej nopa tlanauatianij uan inintlateuijkauaj.