Okseki altepemej tlen okatkaj Canaán okimatkej tlen opanok Jericó. Uejueyij tekiuajkej itech nonmej altepemej omosetilijkej para kinteuiskiaj israelitas. Pero gabaonitas okichijkej okse tlamantli. Okitatoj Josué ika intlaken tlen yotlajtlanki uan okiluijkej: “Tiuitsej itech se altepetl tlen uejka kajki. Otikmatkej nochi tlen okichi Jehová ijkuak onamechpaleui itech altepemej Egipto uan Moab. Tiyetoskej namotlakeualuan tla nankijtoaj amo nantechteuiskej”.

Josué okinneltokili uan okinmilui amo kinteuiskia. Pero eyi tonal satepan, Josué okimatki gabaonitas amo uejka oualayaj, inmialtepe okatka Canaán. Ik non, Josué okintlajtlani: “¿Tleka onantechkajkayajkej?”. Yejuan okinankilijkej: “Otimomojtijkej porque tikmatij namoDios Jehová namopatka moteuia. Tinamechtlatlaujtiaj amo xitechmiktikan”. Josué okichi tlen okinmiluijka uan amo itlaj okinchiuili.

 Satepan, makuili uejueyij tekiuajkej cananeos iuan insoldados okinteuitoj gabaonitas. Josué iuan isoldados onejnenkej nochi yoak uan okinpaleuitoj gabaonitas. Mostlatika, kualkan opejkej moteuiaj. Cananeos ocholojkej pero Jehová okichi inpan ma uetsi uejueyij tesiuitl. Ijkuakon, Josué okitlajtlanili Jehová ma moketsa Tonaltsin. ¿Tleka Josué okilui Jehová ijkon ma kichiua tla amo keman omoketsaya Tonaltsin? Porque otlaneltokaya itech Jehová ika nochi iyolo. Ik non, Tonaltsin amo okalak. Non tonal otlayoak hasta ijkuak israelitas okintlanilijkej uejueyij tekiuajkej cananeos uan insoldados.