Zvainga zvakaitika ngo pamusoro po Jeriko zvakazika ku majinja amweni o vaKanani. Majimambo avo akasunga kuviya pamwepo kuzotakana no vaIziraeri. Asi vaGibhioni vakaviya no mazano akasiana. Vakaenda ka Joshuwa vakasimira mapendera, vonanga kuti: ‘Tiri kubva ndhambo maningi. Takazwa ngo pamusoro pa Jehovha no zvese zvaakamuitira ku Ejipita no Moabhi. Tigondesenyi kuti amuzotiurai, zve itusu tinozova vashandiri venyu.’

Joshuwa wakazvidavira zve wotendera kutama kuvauraya. Njiku ndhatu jakazotevera, wakazozwa kuti avacaibvepi ndhambo. Vaibva mu nyika yo Kanani. Joshuwa wakabvunjisa vaGibhioni kuti: ‘Matinyepera ngenyi?’ Ivona vakadavira kuti: ‘Taithya! Tinozviziva kuti Jehovha Mwari wenyu anoita hondo ecijivirira imwimwi. Tapota mucadotiuraya.’ Joshuwa aazivi kucinja cigondiso cake zve wakavasiya varipenye.

Pa nguva shomani, majimambo o vaKanani no masoca avo vakathusa vaGibhioni. Joshuwa no masoca ake, vakagogoma usiku hwese  kuti vavaponese. Mangwanani matete akatevera vakamukisa kohwisana. VaKanani vakatanga kuparajana vecitiza. Kuri kwese kwavaienda Jehovha waivakhandirira mapuwe akakura. Joshuwa wakakumbira Jehovha kuti zuva rirambe rakaima. Ngenyi iyena waikumbira Jehovha kuti zuva riime kasike cingozvo arizivi kumboima? Ngokuti Joshuwa waithemba Jehovha. Zuva arizivi kuvira mbhera vaIziraeri vanyise majimambo o vaKanani no masoca avo.