Jériko baa haneʼígíí, Kéínan dineʼé yaa dahodiiztsʼą́ą́ʼ. Naatʼáanii danilínígíí ahíikaigo Ízrel dineʼé bił daʼahidiigą́ą́ł daaní. Ndi Gíbiyan dineʼé łahgo átʼéego dahodeezʼą́. Ééʼ dadíítʼodgo yee hadadiidzaago Jáshowa yaa yíkaigo ádaaní: ‘Nízaadę́ę́ʼ niikai. Ííjip dóó Móʼabdi Jiihóvah tʼáá átʼé nihá áátʼįįdígíí baa dahosidiitsʼą́ą́ʼ. Tʼáá shǫǫdí, doo nihikʼiidoojah da, ndi nihá nideilʼaʼ doo.’

Díí Jáshowa yee lą́ asłı̨́ı̨́ʼ. Tágí jı̨́ azlı̨́ı̨́ʼdóó bikʼijįʼ, doo nízaadę́ę́ʼ nijikaigóó bił bééhoozin. Kéínandę́ę́ʼ naʼaldeeh. Jáshowa Gíbiyan dineʼé ííłní: ‘Haʼátʼíísh biniyé nihindaʼsooloʼ?’ Ádaaní: ‘Nihił daayééʼ! Tʼáá shǫǫdí nidanihółtseed lágo. Nihił béédahozin Jiihóvah niDiyin nilíinii ná naabaah.’ Jáshowa yee lą́ asłı̨́ı̨́ʼ yę́ę bikʼehgo tʼáadoo nabiʼdisteed da.

Tʼáadoo hodiinaʼí, Kéínandę́ę́ʼ naatʼáanii ashdlaʼgo dóó bisiláo Gíbiyan dineʼé yidahodeezʼą́. Gíbiyan dineʼé bíká  azhdoojah biniyé Jáshowa dóó bisiláo tłʼééʼ bíighah jookah. Biiskání abíínígo ałkʼi jiijééʼ. Kéínan dineʼé daʼníłtsʼą́ą́ʼgóó yóóʼajiizhjééʼ ndi, Jiihóvah nílótsoh hakʼijįʼ nayííłtą́. Áko Jáshowa éí Jiihóvah jóhonaaʼéí tʼááłáhígi siʼą́ągo ánílééh, bizhdííniid. Jóhonaaʼéí tʼahdoo tʼááłáhígi siʼą́ą da ńtʼééʼ, áko haʼátʼíí biniyé Jiihóvah kóbizhdííniid? Jó, Jáshowa éí Jiihóvah yaa dzólí. Ízrel dineʼé éí Kéínan binaatʼáanii dóó bisiláo yikʼeh dadeesdlı̨́įʼgo índa iʼííʼą́.