Otyilongo atyiho tyo Kanaa atyinoñgonoka etyi tyaenda mo Jerikoo. Onohamba mbo Kanaa ambuliwaneka opo mbuluise ova Isilayeli. Mahi ova Gibeau ankho vena olusoko luelikalela. Avaende ku Josue, novikutu viatandauka nokuapwa avapopi okuti: ‘Tuatunda kotyilongo tyimwe tyokokule. Tueiva oñgeni Jeova emukuatesako kova Egitu no kova Moabe. Tupopile okuti kamamutuluisa, iya onthue matukala ovapika venyi.’

Josue etavela atolela ova Gibeau okuti kamaveveluisa. Mahi, etyi palamba ononthiki ononthatu, Josue anoñgonoka okuti ova Gibeau ankho kavakala kokule no Kanaa. Josue evepulu okuti: ‘Omokonda yatyi muetukembela?’ Avakumbulula okuti: ‘Ankho tuatila owoma! Tutyii okuti Jeova, Huku yenyi, ukahi nokumukuatesako opo mutambule otyilongo tyo Kanaa. Mbambavo muehetuipaei! Josue alingi etyi apopia ahaluisa ova Gibeau.

Etyi pakala katutu, onohamba ononthano mbo ko Kanaa ava kaluisa ova Gibeau. Mahi Josue nomafualali ae avakuatesako  ova Gibeau. Ova Isilayeli avaende otyinthiki atyiho, etyi kuatya avahimbika okuluisa ova Kanaa. Ova Kanaa aveliyandyana pokukahateka. Jeova alokesa ombila yomamanya kombanda yavo. Iya Josue aiti ku Jeova atalameke ekumbi. Omokonda yatyi Josue aitila Jeova atalameke ekumbi tyina ehenetyimone? Omokonda Josue ankho uyumba onthumbi mu Jeova. Ngetyi Josue aita, ekumbi alitalama onthiki aiho alo ova Isilayeli vafinda ono hamba mbo Kanaa no nondyale mbavo.