Maanle ngakyile mɔɔ bɛwɔ Keena la dele kɛzi bɛzɛkyele Gyɛleko la. Bɛ arelemgbunli ne mɔ yɛle kɛ bɛyɛ ko na bɛ nee Yizilayɛma aho. Noko Gebɛyɔnoma nyianle adwenle ngakyile. Bɛwulale adɛladeɛ mɔɔ ɛtete la bɛhɔle Dwɔhyua ɛkɛ na bɛhanle bɛhilele ye kɛ: ‘Yɛvi moa kpalɛ a yɛra a. Yɛde Gyihova nganeɛ yɛɛ mɔɔ yeyɛ yemaa bɛ wɔ Yigyibiti nee Mowabe la. Bɛbɔ yɛ ɛwɔkɛ kɛ bɛnrɛteta yɛ, na yɛbayɛ bɛ ngɛkɛlɛ.’

Dwɔhyua liele bɛ lile na ɔhanle kɛ bɛnrɛteta bɛ. Ye kenle nsa anzi, ɔnwunle kɛ amuanrɛɛ bɛnvi moa biala. Bɛvi Keena azɛlɛ azo. Dwɔhyua bizale Gebɛyɔnoma ne kɛ: ‘Duzu ati a bɛbɔle adalɛ bɛhilele yɛ a?’ Bɛbuale kɛ: ‘Ɛnee yɛsulo! Yɛze kɛ Gyihova bɛ Nyamenle ne ɛlɛko amaa bɛ. Yɛsɛlɛ bɛ bɛmmaku yɛ.’ Dwɔhyua lile ye ɛwɔkɛ zo yemɔti ɔgyakyile bɛ.

Yeangyɛ, Keena arelemgbunli nnu nee bɛ sogyama vale konle doale Gebɛyɔnoma. Dwɔhyua nee ye sogyama zile nu nɔe ne kɛ bɛkaboa bɛ. Ye alehyenlɛ nu yɛɛ bɛbɔle konle ne abo a. Keenama  bɔle ɔ bo kɛ bɛnriandi. Ɛleka biala mɔɔ bɛnriandile bɛvale la Gyihova dɔle ezuawolɛ guale bɛ nwo zo. Akee Dwɔhyua zɛlɛle Gyihova kɛ ɔmmamaa sɛnzɛne ne tu ɔ bo. Duzu ati a ɔhanle kɛ Gyihova mmamaa sɛnzɛne ne tu ɔ bo wɔ mekɛ mɔɔ debie zɛhae bie ɛtɛsile ɛlɛ la ɛ? Ɔluakɛ ɛnee Dwɔhyua lɛ Gyihova anu anwodozo. Sɛnzɛne ne andu ɔ bo wɔ alehyenlɛ ne anu amuala too Yizilayɛma lile Keena arelemgbunli nee bɛ sogyama ne anwo zo konim.