Иерихоныл цы хабар ӕрцыд, уый тыххӕй фехъуыстой ӕнӕхъӕн Ханааны цӕрӕг адӕмтӕ. Ӕмӕ сӕ паддзӕхтӕ сфӕнд кодтой израилӕгтимӕ схӕцын. Фӕлӕ сӕм Гаваоны цӕрджытӕ не ’рбаиу сты. Уыдон сӕ уӕлӕ зӕронд дзаумӕттӕ скодтой ӕмӕ Йесо Навинмӕ ацыдысты. Куы ныххӕццӕ сты, уӕд ын загътой: «Мах ӕрцыдыстӕм дард бӕстӕйӕ. Мах фехъуыстам Йегъовӕйы тыххӕй, стӕй уын Египеты ӕмӕ Моавы зӕххыл куыд баххуыс кодта, уый тыххӕй. Дзырд нын раттут, нӕ ныхмӕ кӕй нӕ рацӕудзыстут, ӕмӕ уын уӕд мах лӕггад кӕндзыстӕм».

Йесо Навин сыл баууӕндыд ӕмӕ сын дзырд радта, сӕ ныхмӕ сын кӕй нӕ рацӕудзысты. Ӕртӕ боны фӕстӕ рабӕрӕг, ӕцӕгӕй дард бӕстӕйӕ кӕй нӕ уыдысты. Уыдон дӕр Ханааны зӕххӕй уыдысты, ӕмӕ сӕ Йесо Навин бафарста: «Цӕмӕн нӕ асайдтат?» Гаваойнӕгтӕ йын загътой: «Мах фӕтарстыстӕм! Мах зонӕм, уӕ Хуыцау Йегъовӕ уӕ сӕрыл кӕй тох кӕны. Уӕ хорзӕхӕй, ма нӕ амарут». Йесо Навин йӕ ныхас нӕ фӕсайдта, ӕмӕ сӕ удӕгасӕй ныууагъта.

Бирӕ нӕ рацыд, афтӕ ханаайнаг паддзӕхтӕ се ’фсӕдтимӕ гаваойнӕгты ныхмӕ рацыдысты. Уӕд Йесо Навин ӕмӕ йе ’фсад ӕнӕхъӕн  ӕхсӕв гаваойнӕгты зӕхмӕ фӕцыдысты, цӕмӕй сӕ сӕрыл рахӕцыдаиккой. Дыккаг бон райсомӕй раджы израилӕгты ӕфсад ханаайнӕгты ӕфсадимӕ схӕцыд. Ханаайнӕгтӕ алырдӕмты фӕлыгъдысты. Фӕлӕ уӕддӕр нӕ аирвӕзтысты – Йегъовӕ сыл арвӕй стыр дуртӕ ныккалдта. Стӕй Йесо Навин Йегъовӕйӕ ракуырдта, цӕмӕй хур ӕрлӕууын кодтаид. Цымӕ дзы ахӕм диссаг кӕй ракуырдта, уый цӕуыл дзурӕг уыд? Йӕ зӕрдӕ йыл ӕнӕхъӕнӕй дӕр кӕй дардта, ууыл. Ӕмӕ Йегъовӕ дӕр хур ӕрлӕууын кодта! Ӕмӕ цалынмӕ израилӕгтӕ се знӕгты нӕ ныццагътой, уӕдмӕ хур ӕнӕхъӕн бон йӕ бынатӕй нӕ фезмӕлыд.