Jericó llajta chinkachisqa kasqantaqa, Canaanpi kaj llajtasmanta runas uyarerqanku. Chayrayku reyesninkoqa israelitaswan maqanakunankuta nerqanku. Gabaonmanta runastaj, thanta ropasta churaykukuspa Josuewan parlamorqanku. Paykuna nerqanku: “Karumanta jamuyku, uyariyku Jehová Diosniykichejmanta, Egiptopi, Moabpi imatachus ruwasqanta ima. Mana wañuchinawaykuta jurankichej chayqa, kamachisniykichej kasqayku”, nispa.

Josueqa paykunata creespa jurarqa mana wañuchinanta. Kinsa dianmantaj yacharqa gabaonitas Canaanmanta kasqankuta. Chayrayku Josué paykunaman nerqa: “¿Imaraykutaj chʼaukiyawaykuri?”, nispa. Gabaonitastaj nerqanku: “Wañuchinawaykuta manchachikorqayku. Yachayku Jehová Diosniykichej qankunarayku maqanakushasqanta. Ama wañuchiwaykuchu ari”, nispa. Josuetaj jurasqanta juntʼarqa, nitaj paykunata wañucherqachu.

 Pisi tiemponman Canaanmanta 5 reyes, gabaonitaswan maqanakoj rerqanku. Josuetaj soldadosninwan tukuy tutantin rerqa gabaonitasta yanapaj. Qʼayantintaj tutamanta maqanakuyta qallarerqanku. Cananeosqa tukuynejman ayqekorqanku, Jehová Diostaj jatuchaj rumi chhikachaj granizosta kachaykamorqa. Chantá Josueqa Jehová Diosmanta mañakorqa intita sayachinanta. Chaykamaqa ni jaykʼaj inti pachanpi sayaykorqachu. Josueqa chayta mañakorqa Jehová Diospi mayta atienekusqanrayku. Intitaj pachanpi sayarqa israelitas chay phishqa reyesta, soldadosninkutawan atipanankukama.