Canaanchö juk nacionkunam Jericöchö ima pasakunqanta musyariyarqan. Tsëmi tsë nacionkunapa reyninkunaqa israelïtakunawan pelyayänampaq juntakäyarqan. Peru tsë ëwëchö täraq Gabaon nunakunaqa juknöpam pensayarqan. Makwa röpakunata vistikïkurmi Josuëman chäyarqan, y kënömi niyarqan: “Alläpa karu sitiupitam shayämurqö. Jehovä pï kanqanta y qamkunarëkur Egiptuchö y Moabchö imakunata ruranqantam wiyayarqö. Mana ushakätsiyämänëkipaq äniyämaptikiqa, sirweqnikikunam kayäshaq”.

Josuëqa creirirqanmi, tsëmi pëkunata mana imanäyänampaq änirqan. Peru kima (kimsa) junaqkuna pasariptinmi Josuëqa musyarirqan Gabaon nunakunaqa karupitatsu kayanqanta, sinöqa patsan Canaanpita kayanqanta. Tsëmi Josuëqa “¿imanirtaq ulipäyämarqunki?” nirqan. Tsënam kënö niyarqan: “Alläpa mantsakurmi. Musyayämi qamkunarëkur Diosnikikuna Jehovä pelyanqanta. Ama wanïkatsilläyämëtsu”. Josuëqa änikunqanta cumplirmi pëkunata imanarqantsu.

 Tsëpita wallka tiempullatam Canaanpita pitsqa reykuna y tröpankuna Gabaon nunakunata ushakätsita munayarqan. Tsëmi Josuëqa tröpankunata pusharkur Gabaon nunakunata salvaq paqasnimpi ëwarqan. Y waränin junaqqa patsa waraqllam pelyar qallëkuyarqan. Y Canaan nunakunaqa më tsëpam escapakuyarqan, peru Jehovämi pëkunapa jananman mëtsikasaq rumikunata tamyëkatsirqan. Y tsëpinmi Josuëqa Jehoväta rogakurqan këkanqanllachö inti (rupay) quedarinampaq. Y intiqa manam ni imëpis tsënö quedakushqatsu karqan. Peru ¿imanirtaq Josuëqa tsëta mañakurqan? Jehoväman alläpa confiakurmi. Tsënöpam intiqa mana jeqarqantsu. Tsë junaqqa manam ampirqantsu hasta Canaanpita reykunata y tröpankunata israelïtakuna venciyanqanyaq.