Кода, со сас лэ Иерихоноса, ашундэ и народоря андо Ханаано. Лэндирэ царёря закамлэ тэ жан против израильтяноря. Но и гаваонитяноря тердэ па аврятэ. Вонэ линэ пэр пэстэ пурани, домарди йда, авелэ каринг о Иисусо Навино и ԥэндэ: «Амэ жылям баро дром. Амэ ашундям важ о Иегова и со во стердя важ тумэндэ андо Египто, и андо Моаво. Дэн алав, кай тумэ на дэна пар мэндэ и тоди амэ аваса тумарэ слуӷоря».

О Навино патяя лэнди и дя алав, кай на стерэла када. Через трин дес во уӷангля, кай вонэ найдур жувэн, андо Ханаано. О Иисусо Навино пушля лэндар: «Васо тумэ хохадэ?» И гаваонитяноря ԥэндэ: «Амэ фартэ пэрэдарайлям! Амэ ашундям, кай пала тумэндэ тердёл тумаро Дэл о Иегова. Мангас тумэн, на умарэн амэн». О Иисусо Навино зритярдя пэско алав и на умардя лэн.

Прожыля время и панч ханаански царёря лэ воинонэнца закамлэ тэ умарэн лэ гаваонитянонэн. Сар када уӷангля о Иисусо Навино и лэстирэ воиноря, вонэ жылэ тэ поможын лэнди. Вонэ жанас вся рят.  Тэ марэнпэ вонэ линэ рано тэсара. Хананеёря рознашлэпэ ко каринг. Тоди о Иегова ля тэ шол па нэбо барэ пэр лэндэ бара. О Навино мангля лэ Иеговас, кай во тэ тердярэл о қам. Инке ни еқвар на сас кацаво, кай о қам тэ тердёл пэ ек ҭан. Тоди васо о Навино мангля лэ Иеговас пала када? Во фартэ патялас, кай о Иегова стерэла када важ лэндэ. О қам на зажалас цыло дес. Важ када израильтяноря вицэлдэ и война лэ хананейсконэ царёнэнца и лэндирэ воинонэнца.