Tsy ela avao le fa reni-firenena hafa a Kanana ao rey ty raha nahazo ani-Jeriko. Niharo raiky hanafiky ani-Israelita rey amy zay ty mpanjakan- drozy. Fe ty Gibeonita tsy ta hanao ani-zay. Nisiky akanjo fa rotarota rozy, le namonjy ani-Josoa ka nivola hoe: ‘Baka an-tany lavitsy biby any lahy zahay. Renay ty mikasiky ani-Jehovah noho ty raha iaby nataony ho anareo ta Ejipta noho Moaba any. Ka mialy aminay lahy, fa avy etoa zahay soa ho mpanomponareo.’

Natoky an-drozy Josoa ka naneky hoe tsy hanafiky an-drozy. Telo andro tafarani-zay, le nihaini-Josoa hoe kay hondy tsy baka an-tany lavitsy any Gibeonita rey, fa mipetraky mba-Kanana mbeny avao. Nanontaneani-Josoa rozy hoe: ‘Ino zao ty antony nampavandy anareo?’ Le namaly rozy hoe: ‘Natahotsy zahay! Hainay fa miaro anareo Jehovah Ndranaharinareo. Mba ka vonoa lahy zahay.’ Nitanjaky ty safàny Josoa, ka tsy namono an-drozy.

Tsy ela tafarani-zay, le nisy mpanjaka kananita limy noho ty maramilan-drozy nampitahotsy ani-Gibeonita reo hoe hanafiky an-drozy. Farany nandeha haly Josoa noho maramilany rey mba hiaro  an-drozy. Hamaray maraindrain’iny, le nanomboky nialy rozy. Resy Kananita rey ka nisabadida, fe avy le nandatsahani-Jehovah havandra bevata biby ze nilaisan-drozy. Nangataky tamy Jehovah Josoa mba hataony tsy mihetsiky masoandro iny. Mbo tsy nisy raha manahaky ani-zay mihintsy bakany bakany zay, ka nanino Josoa ro nangataky ani-zay? Satria tena natoky ani-Jehovah ie. Tsy nilentiky vatany masoandro iny tamy andro io zisiky naharesy ani-mpanjaka kananita rey noho ty maramilan-drozy.