Sa faalogo isi nuu i Kanana e faatatau i le mea na tupu i le aai o Ieriko. Na filifili tupu o na nuu e aufaatasi ina ia tau faasaga i tagata Isaraelu. Ae e ese le mea sa mafaufau i ai tagata Kipeona. Na latou ō atu iā Iosua i ofu tuai ma masaesae, ma faapea atu iā te ia: ʻUa matou ō mai i se nuu mamao lava. Na matou faalogo i tala e faatatau iā Ieova ma mea uma na ia faia mo outou i Aikupito ma Moapi. Ia tautō mai e tou te lē osofaʻia i matou, ma o le a avea i matou ma a outou auauna.’

Na talitonu Iosua iā i latou ma na lotomalie e aua neʻi osofaʻia i latou. I le tolu aso mulimuli ane, ae iloa e Iosua e latou te lē ō mai i se nuu mamao. Na latou ō mai mai i Kanana. Na fesili atu Iosua i tagata Kipeona: ʻAiseā na outou pepelo ai iā i matou?’ Na latou tali mai: ʻNa matou fefefe. E matou te iloa o loo tau Ieova lo outou Atua mo outou. Faamolemole aua neʻi fasiotia i matou.’ Na tausisi Iosua i lana folafolaga ma faasaoina i latou.

E leʻi umi ae taumafai tupu e toʻalima o Kanana ma a latou ʻautau e osofaʻia tagata Kipeona. Sa savavali Iosua ma lana  ʻautau i le pō atoa ina ia faasaoina tagata Kipeona. Na amata le taua i le taeaopō o le aso na sosoo ai. E eseese nofoaga na sosola i ai tagata Kanana, ma o so o se mea lava na latou sosola i ai na lafo mai ai e Ieova maa tetele. Ona talosaga atu lea o Iosua iā Ieova ina ia faatumauina pea le lā. Aiseā ua talosaga atu ai Iosua iā Ieova i lenei mea, ae e leʻi iai lava se taimi muamua na tumau ai le lā? Talu ai na talitonu atoatoa Iosua iā Ieova. Na tumau pea le lā i le aso atoa seʻia oo ina fasia e tagata Isaraelu tupu o Kanana ma a latou ʻautau.