Bangsa wal᷊inẹ su Kanaan nakaringihẹ̌ soal u Yerikho. Manga datung i sire nasěmbaụ lumawang tau Israel. Katewe, tau Gibeon piạ rencana wal᷊inẹ. I sire něpakẹ lakụ těbe seng naghaghědẹ, bọu ene nakoạ sarang i Yosua kụ naul᷊ị, ’I kami diměnta bọu tampạ marau. I kami nakaringihẹ̌ soal i Yehuwa dingangu apa nikoạ’E gunang i kamene su Misirẹ̌ lai su Moab. Pẹ̌diandiko si kami i kamene tawe mẹ̌pěrang dingangi kami, kụ i kami sarung makoạ ělang i kamene.’

I Yosua nangimang si sire kụ i sie nẹ̌diandi tawe mẹ̌pěrang dingangi sire. Tělu ěllo bọu ene, i sie buhudeng nakasingkạ i sire ene bal᷊inẹ bọu tampạ marau, katewe bọu Kanaan. I Yosua nẹ̌kiwal᷊o si sire, ’Kawe i kamene nẹ̌konti?’ I sire simimbahẹ̌, ’I kami matakụ, i kami masingkạ i Yehuwa Mawung kamene měpẹ̌pěrang gunang i kamene. Tul᷊ungko abe pate i kami.’ I Yosua někoạ apa seng niriandine kụ tawe němate si sire.

Tawe nararěna bọu ene, lima datung Kanaan dingangu pasukan i sire mapulu mẹ̌pěrang dingangu tau Gibeon. Yosua dingangu  prajurite natamai gunang měnal᷊amatẹ̌ tau Gibeon. I sire dimal᷊eng su kanandụu hěbi. Dịěllone mal᷊ukadẹ̌, i sire něnětạ nẹ̌pěrang. Tau Kanaan nẹ̌kal᷊iaesẹ̌ němpẹ̌tal᷊ang. Katewe, i Yehuwa něngěntungu watu gaghaghuwạ si sire. Bọu ene i Yosua nẹ̌dorong si Yehuwa gunang měkoạ matangěllo tawe sumědạ. Kawe nụe i Yosua nẹ̌dorong hal᷊ẹ̌ ene, sěmbal᷊ia hal᷊ẹ̌ kerene bědang tawe nariadi? Ual᷊ingu i Yosua mangimang si Yehuwa. Su ěllo ene, matangěllo tawe simědạ sarang tau Israel nakakala manga datung Kanaan dingangu pasukan i sire.