Nirey ty firenena kananita ila’e ty raha niseho ta Jeriko tao. Nifagneke ty mpanjaka iareo fa hialy amo o Israelitao. Faie tsy te hanao izay o Gibeonitao. Nimbamy i Josoa mbeo iareo sady nanao akanjo riadriatse. Hoe iareo: ‘Ndaty boake lavitse zahay sady fa rei’ay ty natao i Jehovah tama’areo ta Ejipta naho ta Moaba agne. Ko vonoe’areo zahay fa anò mpiasa’areo.’

Nino ty reha iareo ty Josoa le tsy nanafike iareo. Telo andro tafara tatoy, le fanta i Josoa tie tsy boake lavitse zao o Gibeonitao fa boake a Kanana ao avao. Le hoe ty Josoa: ‘Nagnino zahay navandeza’areò?’ Le hoe iareo: ‘Natahotse zahay, satria fanta’ay fa i Jehovah ty mialy ho anareo. Ko vonoegne zahay aba.’ Nitagne ty vava nanoe’e ty Josoa, le tsy namono iareo.

Tsiela tafara izay, le nanafike o Gibeonitao ty mpanjaka dime o Kananitao. Nandeha amy i halegney ty ry Josoa mba hagnavotse iareo. Nanomboke i alỳ naho fa nimaray igne. Nanomboke nilay  i Kananita rey, faie le avy le nandefasa i Jehovah havandra bey vente. Nangatake tamy i Jehovah ty Josoa naho fa niavy eo mba tsy hihetseha i masoandroy. Ino ty nahavy i Josoa hangatake izay? Natoky i Jehovah reke. Tsy nihetseke vata’e i masoandroy tamy izay, le rese i Israelita rey iaby ty mpanjaka dime o kananitao naho ty maramila’e.