A vanhu van’wani le tikweni ga Khanani va no zvi tiva lezvi zvi nga humelela le dhoropeni ga Jeriko. A tihosi ta madhoropa lawa man’wani ya Khanani ti no zvi wona zvi hi chukwana ku patsana ti yalwa ni vaIzrayeli. Kanilezvi, a vaGibheyoni va no alakanyela ku maha zvin’wani zvo hambana ni lezvo. Va no boha tinguwo to hlakala, vaya ka Joxuwa va yaku: ‘Hita hi tikweni ga le kule. Hi zwile mahungu xungetano hi Jehovha ni zvontlhe lezvi a nga mu mahela le Gibhite ni le Mowabhi. Loku u ku u nga ta hi vhukela, hi ta maha malandza ya wena’.

Joxuwa i no kholwa lezvi va nga wula zvonake a vhumela lezvaku a nga ta va vhukela. Andzhako ka masiku manharu, i no pola lezvaku va wa ngati hi ka tiko ga le kule. Va wa hi va kwalomo tikweni ga Khanani. Joxuwa i no wutisa vaGibheyoni aku: ‘Hikuyini mu nga hi hembela’? Va hlamula vaku: ‘Hi wo chava! Ha zvi tiva lezvaku Jehovha Nungungulu wa n’wina wa mu lwela. Hi kombela ku mu nga hi dayi’. Joxuwa i no maha lezvi a nga tsumbisile, a va tsika va hanya.

Na ku nga se hundza cikhati co leha, a vaGibheyoni va no tiva lezvaku a 5 wa tihosi ta vaKhanani ni masochwa ya tona ti lava ku va dhumela.  A vaGibheyoni va no sangula ku chava. Joxuwa ni masochwa yakwe va no famba wusiku gontlhe lezvaku va ya va lwela. Va no sangula kulwa ni mixo ya kona. A vaKhanani va no sangula ku tsutsuma va hangalaka. Kontlhe lomu va nga tsutsumela kona Jehovha i no nisa maralala ya hombe hehla kabye. Joxuwa i no kombela Jehovha lezvaku a nyimisa gambo. Hikuyini a nga kombela Jehovha lezvaku a maha lezvo kuveni a gambo gi wa nga se tshuka gi nyima? Hi ku Joxuwa i wa tsumba Jehovha. A gambo gi no nyima futsi gi nga peli kala a vaIzrayeli va hlula tihosi ta vaKhanani ni masochwa ya tona.