Abantu baingi omu mahanga ga Kanani bakahurra nk’oku Yeriko ekaba ehwerekereziibwe. Abakama b’amahanga ganu bakacwamu kweteraniza nukwo barwanise Abaisareri. Baitu abantu ba Gibeoni bakakora ekintu ekirukwahukanaho n’abakama abo. Bakajwara ebitengo bagenda hali Yosuha bamugambira bati: ‘Turugire omu nsi ya hara muno. Tuhuliire byona Yahwe ebi yabakoliire obu mukaba muli omu ihanga lya Misiri n’omu nsi ya Moabu. Muturaganize ngu timuliturwanisa, kandi naitwe tulifooka bairu banyu.’

Yosuha akaikiriza ebi bamugambire kandi yabaraganiza ngu akaba atarukwija kubarwanisa. Obu harabireho ebiro bisatu, Yosuha akakyetegereza ngu bakaba batarugire hara, baitu bakaba nibaruga omu Kanani. Yosuha akabakaguza ati: ‘Habwaki mwatubihire?’ Bakamugarukamu bati: ‘Tukatiina muno! Tumanyire ngu Yahwe Ruhanga wanyu nuwe arukubarwanirra. Nitubesengereza caali mutatwita.’ Yosuha akahikiriza eky’akaba abaraganiize tiyabaita.

 Hanyuma y’obwire buke, abakama bataano aba Kanani n’amahe gabo bakaija kurwanisa abantu ba Gibeoni. Yosuha n’ihe lye bakarubata itumbi lyona nibagenda kujuna abantu ba Gibeoni. Obwire obubwakiire, bakatandika kurwana. Abantu ba Kanani bakatandika kwiruka obulemu nibairukira omu buli nsonda yoona. Baitu buli hamu hoona nambere bairukiraga, Yahwe yanagayoga orubale rw’amaani nirubaita. Yosuha akasaba Yahwe ayemereze izooba lireke kugenda. Habwaki Yosuha yasabire Yahwe kukora ekintu nk’eki ekyali kitakabahoga? Habwokuba akaba n’ayesiga Yahwe. Izooba likamara ekiro kyona lyemeriire omu kiikaro kimu kuhikya Abaisareri obu basingwire abakama aba Kanani n’amahe gaabo.