Иерихон-биле болган чүүл Ханаанның чоннарынга дыңналы берген. Оларның хааннары израильчилерге удур демнежип алыр дээн, а гаваончулар өскээр алдынган. Олар эрги, самдар хеп кедип алгаш, Нуннуң оглу Иисуска келгеш, мынча дээн: «Бис ырак черден келдивис. Египетке, Моавка Иегованың силерге кылган чүүлүнүң дугайында дыңнадывыс. Бисче халдавазыңарны аазап көрүңер. Ынчан кулдарыңар боор бис».

Нуннуң оглу Иисус оларга бүзүрээш, халдавас деп аксы-сөзүн берген. Үш хонук эрткенде, гаваончуларны Ханаанда чурттап турар деп, ол билип каан. Иисус олардан айтырган: «Бисти чүге мегеледиңер?» Олар аңаа: «Бис аажок корга бердивис! Силер дээш Бурганыңар Иегова демисежип турар деп билир бис. Бисти өлүрбейн көрүңер!» — дээн. Иисус сөзүнге ээ бооп, оларга дегбээн.

Кезек үе эрткенде, Ханаанның беш хааны дайынчылары-биле гаваончуларже халдаар дээн. Иисус гаваончуларга дузалажыр дээш, дайынчылары-биле хондур чоруп келген. Даңгаар  эртен Иисус халдап кээрге, ханаанчылар корткаш, дезип эгелээн. Кайнаар-даа халыырга, Иегова дээрден улуг даш долуну чагдырыпкан. Оон Нуннуң оглу Иисус Иеговадан хүннү тургузуптарын дилээн. Ооң мурнунда хүн кажан-даа турбайн чораан. Иисус чүге ындыг дилег кылган? Чүге дизе ол Иеговага бүзүреп турган. Израильчилер Ханаанның хааннарын болгаш дайынчыларын тиилеп алгыжеге чедир хүн ашпаан.