Te yantik nasionetik yuʼun Canaán la yaʼiyik stojol te bin kʼot ta pasel ta Jericó. Te ajwaliletik yuʼun te nasionetik-abi la snop te jun-nax ya stsob sbaik ta yakʼbeyel guerra te israeletike. Pero te machʼatik nainemik ta Gabaón ay bin la snopik spasel. La slapik pokol kʼuʼuletik, bajtʼik ta stojol te Josué sok jich la yalbeyik: “Namal te banti talemotik. Ay kaʼiyojbeytik skʼoplal te Jehová sok spisil te bintik spasoj ta awentaik ta Egipto sok ta Moab. Teme jamal ya awalik te maba ya awochintayotike, j-abat ya xkʼootik ta atojolik”.

Te Josué la schʼuun sok jamal la yal te maba ya yochintaye. Pero oxeb kʼajkʼal ta patil, te Josué la snaʼ stojol te maba namal talem te gabaonetike, talemik ta Canaán. Jaʼ yuʼun te Josué jich la sjojkʼoylanbey: “¿Bin yuʼun te la aloʼlayotike?”. Jich la sutik: “Yuʼun bayal xiwenotik. Jnaʼojtik te ya yakʼ guerra ta awentaik te Jehová Dios awuʼunike. Awokolukik, mame xa amilotik”. Te Josué la skʼotes ta pasel te bin jamal yaloje, jich maʼyuk bin la spastiklanbey.

 Ta patil bael, joʼtul ajwalil cananeoetik sok te soldadoetik yuʼunike bajtʼ yochintayik te gabaonetike. Te Josué sok te soldadoetik yuʼune beenik sjunal ajkʼabal yuʼun bajtʼ skoltayik te gabaonetike. Ta sakubel kʼinal jajch te guerrae. Te cananeoetik lokʼik bael ta anel ta bayuk, pero te Jehová la yakʼ tal mukʼul batetik ta stojolik. Ta patil te Josué la skʼanbey te Jehová te yakuk xtejkʼaj ta beel te kʼajkʼale. Maʼyuk jich tejkʼajem ta beel te kʼajkʼale. ¿Bin yuʼun te jich la skʼan te Josué? Jaʼ ta skaj te bayal smukʼul yoʼtan ta stojole. Jich yuʼun tejkʼaj ta beel te kʼajkʼale. Maba ijkʼub te kʼinal ta kʼajkʼal-abi, jaʼto kʼalal te israeletik la stsalik te ajwalil cananeoetik sok te soldadoetik yuʼunike.