Tsy ela efa ren̈iny firenenany kananita hafa raha nahazo Jeriko. Ke nan̈ano jery araiky panjakandro firenena aby io hiady taminy Israelita. Fa iro Gibeonita aby io tsy nan̈ano karaha iro. Nisikiny lamba boroboroko iro, baka io nandeha tamy Josoa. Iro nivolan̈a taminany: ‘Zahay io baka lavitry navy aminao atỳ io. Efa ren̈inay raha jiaby nataony Jehovah taminy Ezipta ndreky Moaba, niarovan̈a anaro. Zahay aza vonen̈a, fa ataova panomponaro.’

Nino volan̈andro zen̈y Josoa, ke nibanjainy fo iro. Nafaka telo andra, hitany Josoa fa kaiky iro nipetraka narikitry tio. Ta Kanana tao fo. Josoa nivolan̈a tamy Gibeonita aby io: ‘Nan̈ino anaro navandy taminay?’ Iro nivolan̈a: ‘Zahay efa navozo. Hainay fa Jehovah man̈ampy anaro fo. Ke mba aza vonen̈a zahay e!’ Josoa tsy nivadiky tamy volan̈anany ke iro nambelany velon̈o.

Tsy ela tafaranizen̈y, nandeha niady tamy Gibeonita aby io panjakany kananita dimy ndreky maramilandro. Nan̈ano dia alin̈y nandeha nan̈avotro iro Josoa ndreky maramilanany. Nikomansy  ady, koa fa ho kiaka andra. Resy iro Kananita aby io ke nanomboko nilefa eraka tany jiaby, fa Jehovah nandatsaka bolongany lagilasy tamindro. Josoa baka tio nangataka tamy Jehovah, baka masoandra io antaony tsy mihetsiky. Raha karaha zen̈y mbala tsiary nisy foeky taloha tan̈y. Fa Josoa nasaky nangataka zen̈y tamy Jehovah fotony izy natoky Jehovah. Tsy tsofotro foeky masoandra taminandra io, ke resindro Israelita aby io panjaka kananita dimy ndreky maramilandro.