Ora binadiaga ca binni de Canaán ni bizaaca Jericó. Ca rey stiʼ ca guidxi riʼ bidaagucaʼ para tíndenecaʼ ca israelita. Peru ca binni de Gabaón guníʼ íquecaʼ gúnicaʼ ti cosa. Gúcucaʼ lari yuxe, guyecaʼ ra nuu Josué ne gúdxicabe laa: «Ziúpadu de ti guidxi zitu. Maʼ binadiágadu de guiráʼ cosa ni maʼ biʼniʼ Jiobá pur laatu dxi nuutu Egipto ne Moab. Pa guni prometertu qué zucaalutu laadu, zácadu esclavu stitu».

Biʼniʼ cré Josué laacabe ne biʼniʼ prometer qué zucaalú laacabe. Chonna gubidxa despué, bidii Josué cuenta cadi dxandíʼ de zitu zeedacabe sínuque de Canaán laacabe. Ngue runi gunabadiidxaʼ Josué laacabe: «¿Xiñee bisiguiitu laadu pue?». Óraque bicábicabe: «Purtiʼ bidxíbidu. Nánnadu ridinde Jiobá pur laatu. Nga runi, rinábadu laatu cadi guutitu laadu». Biʼniʼ cumplir Josué promesa ni biʼniʼ ne qué ñuni laacabe gastiʼ.

Qué nindaa, bicaalú gaayuʼ rey de Canaán ne ejércitu sticaʼ ca gabaonita. Guzá Josué ne ejércitu stiʼ guidubi ti gueelaʼ para gulá ca  gabaonita. Sti dxi que, tempranu bizulú gudíndecabe. Ora biʼyaʼ ca cananeu que laacabe bizulú bixooñecaʼ, peru bisaba Jiobá granizu naroʼbaʼ íquecaʼ. Óraque, gunabaʼ Josué Jiobá guzuhuaadxí Gubidxa. Qué huayuu dxi gaca ndiʼ. Yanna, ¿xiñee gunabaʼ Josué ndiʼ yaʼ? Purtiʼ gúpabe stale confianza Jiobá. Ngue runi qué ñaaziʼ Gubidxa. Ne qué nicahui dxi que dede ora biʼniʼ ganar ca israelita ca rey stiʼ Canaán ne ejércitu sticaʼ.