Stipnés gudx ni goyoʼ Canaán gonyibu ni gosaclóo gudx Jericó. Rey xtuny guirá gudxcú gocyibu toibsi par tíilyibu né israelitas. Per buñ gabaonitas góc naní xcalrrien. Godocyibu lairyaʼay né goyeeyibu ronoʼ Josué né goniʼyibu: «Sieeldo de toib gudx ni riaʼan sitgoluʼ. Ma bicadiagdo de Jehová né guirá ni ma bunybu por lóoto lainy gudx Egipto né Moab. Pal raduidyto xtiitzto que diti noʼ xi sonyto lóodo, lóodo sacdo xomósto».

Josué buny crer ni goniʼyibu né biduidybu xtiitzbu que diti noʼ xi sacyibu. Godudy tzón govitz ór cú Josué gon que buñ gabaonitas diti nigolú rabésyibu sit, xalagary ngú nacyibu de Canaán. Por ngú Josué gonabdiitz layibu: «¿Xigony biscúto lóodo?». Layibu cuapyibu: «Portín bidzuibydo. Nandxichdo que Jehová Dios xtunyto cadíilbu par guilaabu lóoto. Ranabdo lóoto, diti guigaityto lóodo». Josué buny cumplir xtiitz né diti noʼ xi buny layibu.

 Diti xidzú, gáay reyes cananeos né guiráca soldadyibu goyeeyibu par nanitlóyibu buñ gabaonitas. Josué né guiráca soldadbu gosaayibu guidopynac gueʼel par nalaayibu gabaonitas. Stoib dzúcu, rosildiguieʼ gosaló godíilyibu. Buñ cananeos gosaló bixony guirá lad, per Jehová bisiab tipnés laver ropdann laidyibu. Después Josué gonabbu lóo Jehová que Govitz diti ñaʼisni dzúcu. Ni gonab Josué diti ma gocni ni toib buelt, per ¿xigony gonabbu ngú? Portín gopbu xiroʼ confianz lóo Jehová. Dzúcu diti goyoʼ gueʼel, dada órni israelitas bunyibu gan guirá reyes xtuny Canaán né soldad xtuny.