I ng’ei ma Yocuwa utelo wi dhanu pa Mungu pi oro ma dupa, egam etho nwang’u etie ku oro 110. Saa ma fodi Yocuwa kwo, nyithindho mir Israel gibed giworo kwa Yehova. Ento i ng’ei tho pa Yocuwa, nyithindho mir Israel gicaku woro ayi gin m’acwia, tap calu Jukanan. E Yehova uweko jabim moko mi Kanan ma nyinge Yabin usendgi, pilembe giweko niwore. I ng’eye, nyithindho mir Israel gikwayu Yehova ukonygi. Yehova umio igi jatelwic ma nyen, nyinge Barak. En re m’ukwayu ekony dhanu kara gicak timo ni Yehova.

Debora ma jabila ma dhaku uoro jucidh julwong’o Barak. Enyutho ire wec m’uai i bang’ Yehova, eyero kumae: ‘Ting’ dhanu 10 000 man cidh iromb ku juaskari pa Yabin i kulo mi Kicon. Kuca, ibiloyo Sisera ma tie jadit mi juaskari pa Yabin.’ Barak uyero ni Debora kumae: ‘Abicidho tekene iyio nia wacidh wakudi.’ Debora udwoko ire kumae: ‘Wabicidho wakudi. Re ng’ei nia ibinego Sisera in ungo. Yehova yero nia dhaku re ma binego Sisera.’

Debora ucidho karacelo ku Barak man juaskari pare iwi got Tabor pi niyikiri pi lwiny. Kinde ma Sisera uwinjo lembuno,  ecoko dhu magali pare man udul askari pare i poga. Debora uyero ni Barak kumae: ‘Tin Yehova bimio iri aloci.’ Barak ku dhanu 10 000 giloro i the got Tabor pi nikiedo ku juaskari pa Sisera.

Yehova uketho kulo mi Kicon upong’. E magali pa Sisera umoko i usabu. Sisera uweko magali pare man eringo. Barak ku juaskari pare ginego juaskari pa Sisera ceke, ento Sisera uringo! Ecidh epondo i ot pa dhaku moko ma nyinge Yael. Yael umio ire cak man eume ku balangiti. Olo uketho jaramony maeno upodho iwi nindo. E Yael ubino nya yo yo i ng’ete man eguro pike mi giero hema i wie man etho.

Barak utuc yo pa Yael m’ebesayu Sisera. Yael uwok woko man eyero ire kumae: ‘Mond i ot. Abinyutho iri ng’atu m’ibesayu.’ Kinde ma Barak umondo, enwang’u avuj Sisera re m’uvuto i ot. I ng’eye, Barak giku Debora gipaku Yehova ku wer pilembe eketho Juisrael giloyo judegi migi. Pi oro 40 m’ulubo, nyithindho mir Israel gikwo ku kwiocwiny.