Josueajj walja maranakaw Diosan markapar pʼeqtʼjjäna, 110 maraniw jiwjjarakïna. Jakaskäna ukhajja, israelitanakajj Jehová Diosaruw adorapjjäna. Jiwjjäna ukhasti Canaán markankir jaqenakjamaw falso diosanakar adorjjapjjäna. Janiw Jehová Diosar istʼjjapjjänti, ukatwa Jabín sat cananeo reyin amparapar Diosajj jaytanuküna. Jan walinakan uñjasisajja, israelitanakajj Jehová Diosaruw yanap mayipjjäna. Diosasti Barac sat mä machaq irpiri uttʼayäna. Jupaw israelitanakarojj Jehová Diosar adorjjapjjañapatak yanaptʼäna.

Deborajj profetisa warmïnwa. Jupajj Barac chachar jawsayasaw Jehová Diosan arunakap akham sasin yatiyäna: ‘Jabín reyin ejercitopampi nuwasiñatakejj Cisón valler 10.000 chachanakamp saram. Ukanwa ejercitop pʼeqtʼiri Sísara jaqer atipjäta’ sasa. Barac chachajj Deborar akham sänwa: ‘Nayamp saräta ukhakiw saräjja’ sasa. Deborasti sarakïnwa: ‘Nayajj saräwa, ukampis janiw jumajj Sisarar jiwaykätati. Mä warmiw jiwayani siw Jehová Diosajja’ sasa.

Débora profetisasa, Barac chachasa, soldadonakasa, guerratak wakichasiriw Tabor qollur makatapjjäna. Uk yatisasti, Sisarajj guerrar sarañ carronakapampi soldadonakapampi Cisón valler tantachtʼäna.  Deborajj Barac chachar akham sänwa: ‘Jehová Diosan yanaptʼapampiw jichhürojj atipjäta’ sasa. Barac chachampi 10.000 chachanakampiw Sísara jaqen soldadonakapampi nuwasirejj qollut saraqanipjjäna.

Jehová Diosajj Cisón vallenkir jawiratwa um jilarayäna, uka ñeqʼeruw Sisaran guerrar sarañ carronakapajj achuntäna. Sisarajj carropat saraqasaw escapjjäna. Barac chachampi soldadonakapampejja, Sisaran ejercitoparojj atipjapjjänwa, ukampis Sisarajj escapasaw Jael warmin carpapar imantasïna. Jupajj mä jukʼa leche wajjtʼäna, mä mantampiw janjjatarakïna. Wali qaritätap laykojja, Sisarajj ikjawayjjänwa. Jaelajj kʼachat jakʼachasisaw carpa katjjäsir chʼakurumpi pʼeqepat leqʼentäna (jan ukajj kʼutantäna), ukhamaw Sisarajj jiwjjäna.

Uka qhepatwa Barac chachajj Sisarar thaqkasajj Jael warmin carpapar purïna. Jaelasti carpapat mistusaw akham säna: ‘Mantanim, thaqaskta uka jaqeruw uñachtʼayäma’ sasa. Barac chachajj mantäna ukhajja, Sisararuw jiwat jaqosiskir uñjäna. Cheqas Jehová Diosaw enemigonakapar atipjañatakejj yanaptʼäna, ukatwa Barac chachampi Deborampejj Diosar jachʼañchañatak cantapjjäna. Israelitanakajj 40 maranakaw jan ajjsaras sum jakasjjapjjäna.