Dung marpulu taon mamimpin bangso ni Jahowa, mate ma si Josua. Marumur 110 taon ibana tingki mate. Saleleng ngoluna, manomba Jahowa do halak Israel. Alai dung mate ibana, manomba patung ma halak Israel songon halak Kanaan. Ala ndang manomba Jahowa be nasida, dipasombu Jahowa ma raja ni Kanaan na margoar si Jabin manusai nasida. Dipangido nasida ma asa diurupi Jahowa nasida. Alani i, dipillit Jahowa ma si Barak laho mangurupi nasida mulak tu Jahowa.

Adong do sada panurirang borua na margoar si Debora. Lao do ibana tu si Barak pasahathon hata ni Jahowa. Didok ibana ma, ‘Boan ma 10.000 baoa manjumpangi tentara ni si Jabin di Sunge Kison. Disi, talu ma bahenonmu si Sisera komandan tentara ni si Jabin.’ Didok si Barak ma tu si Debora, ‘Olo do ahu molo dohot ho.’ Didok si Debora ma, ‘Dohot pe ahu. Alai nunga didok Jahowa sahalak borua do na mambunu si Sisera.’

 Laho ma si Debora, si Barak, dohot tentarana tu Dolok Tabor marporang. Alani i, dipapungu si Sisera ma angka tentara dohot kereta porang. Didok si Debora ma tu si Barak, ‘Sadari on monang ma ho bahenon ni Jahowa.’ Turun ma si Barak dohot 10.000 tentarana mangalo tentara ni si Sisera.

Dibahen Jahowa ma banjir Sunge Kison. Ndang boi be mardalan kereta porang ni si Sisera, jala talu ma nasida. Alai lari do si Sisera. Sahat ma ibana di kemah ni sahalak borua na margoar si Jael. Dilehon si Jael ma ibana minum susu jala disalimuti. Tarpodom ma si Sisera. Dung i, dibuat si Jael ma patok ni kemah i. Ditongkok ma patok i tu ulu ni si Sisera. Ujungna, mate ma si Sisera.

Dung i, ro ma si Barak mangalului si Sisera. Kaluar ma si Jael sian kemah i, didok ma, ‘Masuk ma ho. Dison do na niluluanmi.’ Masuk ma si Barak jala diida ma nunga mate si Sisera. Marende ma si Barak dohot si Debora mamuji Jahowa ala nunga monang nasida. Dame ma di Israel saleleng 40 taon.