Pagkatapos nin halawig na panahon bilang lider kan banwaan ni Jehova, nagadan si Josue sa edad na 110. Kan buhay pa siya, si Jehova sana an sinasamba kan mga Israelita. Pero pagkagadan ni Josue, nagsamba na sinda sa mga diyos-diyosan arog kan mga Canaanita. Dahil dai na sinda nagsusunod ki Jehova, itinugot niyang pasakitan sinda kan Canaanitang hadi na si Jabin. Nakimahirak an mga Israelita ki Jehova para sa tabang. Kaya tinawan sinda ni Jehova nin bagong lider, si Barak. Tatabangan niya sinda na magsunod giraray ki Jehova.

Ipinaapod si Barak kan propetisang si Debora. Isinabi kaini an mensahe ni Jehova: ‘Mag-iba ka nin 10,000 na lalaki, tapos atubangon mo an hukbo ni Jabin sa Kison. Madadaog mo duman si Sisera, an hepe kan hukbo ni Jabin.’ Sinabi ni Barak ki Debora: ‘Maduman sana ako kun maiba ka sako.’ Nagsabi si Debora: ‘Maiba ako saimo. Pero tandaan mo, bako ika an makakagadan ki Sisera. Sinabi ni Jehova na sarong babayi an makakagadan saiya.’

Nag-iba si Debora ki Barak kaiba kan hukbo kaini pasakat sa Bukid nin Tabor para maghanda sa pakikilaban. Kan maaraman iyan ni Sisera, tiniripon niya tulos an saiyang mga karwaheng panggiyera asin mga suldados duman sa baba kan bukid. Sinabi ni Debora ki Barak: ‘Ini an  aldaw kun sain tatabangan ka ni Jehova na manggana.’ Sinalakay ni Barak saka kan 10,000 niyang tawuhan an makusugon na hukbo ni Sisera na nasa baba kan bukid.

Pinabaha ni Jehova an sapa nin Kison, kaya nagkaguruot sa laboy * su mga karwahe ni Sisera. Binayaan ni Sisera an karwahe niya tapos nagparadulag. Nadaog ni Barak asin kan mga suldados niya an hukbo ni Sisera, pero nakadulag si Sisera! Nagtago siya sa tolda kan babaying si Jael. Pinainom siya ni Jael nin gatas saka tinamungan. Napaturog an pagal nang si Sisera. Dangan, luway-luway na nagrani si Jael tapos itinaldok sa payo ni Sisera an sarong taldok na pantolda. Nagadan si Sisera.

Nag-abot si Barak na hinahanap si Sisera. Nagluwas si Jael sa tolda asin nagsabi: ‘Maglaog ka. Ipapahiling ko saimo an lalaking hinahanap mo.’ Paglaog ni Barak, nahiling niya si Sisera, gadan na. Nagkanta nin pag-umaw ki Jehova si Barak asin Debora dahil tinabangan sinda ni Jehova na madaog an mga kalaban ninda. Sa suminunod na 40 taon, nagin matuninong an Israel.