Josua i lidim ol man blong Jehova blong plante yia, nao taem hem i gat 110 yia, hem i ded. Taem Josua i laef, ol man Isrel oli gohed blong wosipim Jehova. Be taem Josua i ded, oli wosipim ol aedol, olsem ol man Kenan. Ale, Jehova i letem King Jabin blong Kenan i mekem i strong tumas long olgeta. Nao oli krae long Jehova blong i givhan long olgeta. Ale Jehova i givim wan niufala lida long olgeta, hemia Barak. Barak bambae i givhan long olgeta blong oli kambak long Jehova.

Woman profet ya Debora, i singaot Barak i kam, blong talem wan mesej blong Jehova long hem, i se: ‘Yu singaot 10,000 man, mo yu go mitim Jabin mo ol ami blong hem long Kison Reva. Long ples ya, bae yu winim Siseraha we i komanda blong ol soldia blong Jabin.’ Barak i talem long Debora se: ‘Bae mi go, be yu mas kam wetem mi.’ Debora i talem se: ‘I oraet, bae mi kam wetem yu. Be yu mas save se i no yu we bae yu kilim Siseraha i ded. Jehova bae i putum hem long han blong wan woman.’

Ale, Debora i go wetem Barak mo ol ami blong hem, go kasem hil ya Taboro. Nao oli mekem rere blong faet. Taem Siseraha i harem nius ya, hem i singaot ol soldia oli kam long levelples long medel blong  ol hil, wetem ol kat blong faet blong olgeta. Nao Debora i talem long Barak se: ‘Tede Jehova bae i mekem yu yu win.’ Ale Barak mo ol 10,000 soldia blong hem oli kamdaon blong faet agensem ol strong ami blong Siseraha.

Nao Jehova i mekem se Kison Reva i ron bigwan, mo ol kat blong faet blong Siseraha oli fas long sofmad. !Barak mo ol soldia blong hem oli winim ol ami blong Siseraha, be Siseraha i ronwe, i go haed long haos tapolen blong woman ya Jael! Jael i givim melek long hem blong i dring, mo i kavremap hem long wan blangket. Siseraha i taed, ale hem i slip. Nao Jael i tekem wan sotfala stik, we i blong taetem rop blong haos tapolen long hem, mo wan hama. Nao sloslo i go klosap long Siseraha, mo i planem stik ya long hed blong hem, nao i ded.

Barak i go lukaotem Siseraha. Jael i kam afsaed long haos tapolen, i talem long Barak se: ‘Man ya we yu stap lukaotem, i stap long ples ya.’ Barak i go insaed mo i luk Siseraha we i ded finis. Barak mo Debora i singsing blong presem Jehova, from we hem i mekem ol man Isrel oli winim ol enemi blong olgeta. Nao i gat pis long Isrel blong 40 yia.