Josué a nga wu a bili mimbu 110, valé a wuluya ayoñe Yéhôva mimbu abui. Nté ôse a mbe a vee, bon b’Israël be mbe be kañe’e Yéhôva. Ve nné ane a nga wu, nde be nga taté na ba kañe bengulemelan, aval ane Becananéen be mbe be bo’ok. Mbôle bon b’Israël be nji ke ôsu a bo nye mewôk, Yéhôva a nga jô’é na Jabin, njô bôte ya Canaan, a tibili be. Nde bon b’Israël be nga ye’elane Yéhôva na a volô be. Ane Yéhôva a nga ve be mfefé ntebe ôsu, jôé dé é mbe Barak. Nnye a mbe a yiane volô ayoñe na é bulane bo Yéhôva ésaé.

Zambe a nga lôme Débora, nkuli mejô minga, e be Barak. A nga jô nye na a ke kate Barak foé nyi: ‘Jeñe’e befam 10 000, kele tôbane nkane bita Sisera ôsôé ya Kison. Ma ye volô wo na ô dañe Sisera e bita bite.’ Sisera a mbe ntebe ôsu ya nkane bita Jabin. Nde Barak a nga jô Débora na: ‘Ma ye ke vengevenge ve bia wo bi ne nsamba.’ Éyoñ éte Débora a nga yalane nye na: ‘Ma ye fo’o ke a wo. Ve yeme’e na sa ke wo wo ye wôé Sisera. Yéhôva a nga kate ma na, minga nnye a ye wôé nye.’

Ane Débora, Barak a nkane bita wé, be nga zu kui Nkôle Thabor, a taté na ba kômesan asu bita. Nné ane Sisera a nga wô’ô de, a nga  tôkan bewagon ya bita a bezimbi bé mbi’ili si. Éyoñ éte Débora a nga jô Barak na: ‘Môse wu ñwô Yéhôva a zu bo na ô dañe besiñe bôé bita.’ Barak a bôte bé 10 000 be nga taté na ba sise nkôle na be ke tôban nkane bita Sisera.

Yéhôva a nga bo na ôsôé ya Kison ô bo ndôn. Bewagon bita be Sisera be nga fubane mboto’o été. Ane Sisera a nga sise wagon wé, a taté na a tup. Barak ba bezimbi bé be nga mane wôé bezimbi be Sisera, ve Sisera a nga tup. A nga mate mbil a ke sobô nda éndelé minga éziñ. Minga ate a mbe a to jôé na Jaël. Nde Jaël a nga nyuu nye menyañ, éyoñ éte a nga vute nye mfinga. Sisera ve zu bibane mbee ôyo. Nde Jaël a nga subu nye bebé ôte’etek, a beme nye akône ya nda jé nlô été, é tulane si. Sisera ve wu.

Éyoñe Barak a nga zu a jeñe Sisera, a nga zu koone Jaël a tele mbé ya nda éndélé jé. Nde Jaël a nga jô Barak na: ‘Nyiine nda été, me liti wo môte wo jeñ.’ Éyoñe Barak a nyiineya nda été, a nga koone Sisera a bôô mbim. Ane Barak ba Débora be nga taté na ba yia Yéhôva jia, amu a nga volô bone b’Israël na be dañe besiñe bap. Mimbu 40 mi nga tôñe valé, ayoñ Israël é nga nyiñe mvo’é été.