Josuué uafú ni 110 dia mivu, ua bhitile mivu iavulu kála mutuameni ua mundu ua Jihova. Kioso kia kexile ku muenhu, o akua Izalaiele akexile mu bheza Jihova. Maji kioso Josuué kia fú, ene a mateka ku bheza iteka, kála kia kexile mu bhanga akua Kanana. Mukonda akua Izalaiele ka kexile dingi ku mu belesela, Jihova uehela o sobha ia Kanana Jabine ku zukutisa o mienhu iâ. O athu akexile mu diondela o kikuatekesu kia Jihova. Mu kiki Jihova ua a bhana mutuameni ua ubhe, Balake. Muéne ueji kuatekesa o athu kuvutuka kua Jihova.

O polofeta Debola a mu tumu phala kuia kua Balake. Muéne ua kexile ni njimbu ia Jihova phala ku mu tudila, muéne uambe: ‘Katula kuinhi dia midi dia mala, ndé u takane ni masoladi a Jabine mu honga ia Kixone. Kuenhoko ua-nda tolola Xixela, kabhitangu ka masoladi a Jabine.’ Balake ua tangela Debola: ‘Nga-ndaia ngó se eie uia n’eme.’ Muene uambe: ‘Kiambote nga-ndaia n’eie. Maji k’eie ua-nda jibha Xixela. Jihova uambe kuila, Xixela a-nda mu jibha ku muhatu.’

Debola uai ni Balake ni masoladi mê katé ku mulundu ua Tabola phala kudiudika phala kúlua o ita. Kioso Xixela kievu kiki, muéne ua  bhongolola o makalu mê a ita ni masoladi iu ua kulumuka mu honga. Debola uambela Balake: ‘Lelu kiene o kizuua kia-nda ku bhana o kikoué kua Jihova.’ Balake ni 10.000 dia mala a kulumuka ku mulundu phala kutakana ni kifuxi kia dikota kia Xixela.

Jihova ua bhangesa o honga ia Kixone kuizala ni menha. O makalu a ita a Xixela a naminina mu maloua. Xixela ua xisa o dikalu diê iu ua lenge. Balake ni masoladi mê a tolola o kifuxi kia Xixela, maji Xixela ua lenge! Muéne ua lenge iu ua di sueka mu balaka ia muhatu a mu ixanene Jaiele. Jaiele ua mu bhana lete iu ua mu futu ni divunga. O disoladi dia zeka. Kioso kiai ku kilu, Jaiele uai ni kuzomba, ua mu phaphela ni phapha mu mutué, ia tundila ku mbandu ia mukuá ia mutué anga ufuá.

Balake ueza mu ku sota Xixela. Jaiele ua tundu mu balaka iê iu uambe: ‘Bokona, ngi ku idikise o diiala di ua mu sota.’ Balake ua bokona mu balaka iu ua mono Xixela uafu. Balake ni Debola a ximana Jihova bhu kaxi ka muimbu mu ku kuatekesa akua Izalaiele ku tolola o jinguma jâ. Mu 40 a mivu ia kaiela, mu Izalaiele mua kexile kutululuka.