Le wɔsila bɔɔbɔɔ, Chɔɔsuaa wa simlachinɔɔ le Isɔluɛiya ni. O wa wɔsilaŋ 110 mbo wu. Teleŋ o wa yoomu wo, Chɛhowa kinɛi Isɔluɛiya ndaa piɛi ni. Kɛ mɛɛ o vi, ma kandu piɔmnda sooluuwo, mɛɛ Kenanaitiiya ndaa tosa yɛ. Le mɛɛ nda hiu lachi a Chɛhowa piɛiyo le yɛ, mbo tosa mi masa Kenanaitiiya diolaŋ aa Chabiŋ tusi nda nyɛpalaa choo. Mi Isɔluɛiya nyɔɔlu Chɛhowa le mbo mala nda. Mi Chɛhowa ke nda simlachinɔ cheleŋ diolaŋ aa Baluaki. Ndu ndoo nɔ ni mbo mala Isɔluɛiya le ma miiŋgu vɛlɛ Chɛhowa piɛiyo.

Mi wana lanɔ ndoo suaa le Mɛlɛka wo diolaŋ aa Diboolua, yooŋgu Baluaki. Ndoo nɔ yooŋgu fula Chɛhowa o ba wo le ndu. Mbo dimul ndu aa: ‘Chua puaa 10,000, ma kɔ chiŋalaŋ puaa chɔuwaa Chabiŋ nda a sɔŋgɔɔ o pioo Kisiɔŋ. Wana cho puaa chɔuwaa Chabiŋ nda bolleŋ ndo diolaŋ aa Sisɛlua, loŋ ŋ cho ndu lakɔ ba tiu ni.’ Mi Baluaki dimul Diboolua aa: ‘I cho lakɔ, kɛ mɛɛ naa num.’ Mi Diboolua dimul ndu aa: ‘Ŋ cho lakɔ naa num. Kɛ sina pɛŋgu maa, o cho num te cho Sisɛlua diyɔɔ le. Chɛhowa dimul la maa wana lanɔɔ cho ndu diyɔɔ ni.’

Mi Baluaki chua puaa nduaa chɔuwa, ma kua nda Diboolua latulu o Pembii Tabɔɔ ve choo le ma bɛɛndiaŋ le chɔuwo. Dimioo nuaa mi Sisɛlua tuɛi a hei okɔɔ, mbo chuuŋgiaa nyɛm chɔu suaa naŋndoŋ a puaa nduaa  chɔuwa o pembei bɛŋgu. Mi Diboolua dimul Baluaki aa: ‘Paale hauleŋ ndeŋ Chɛhowa cho tosa ni, ma tiu waŋnda haa ba. Mi Baluaki a puaa nduaa chɔuwa 10,000 tual pembei, ma kɔ chiŋalaŋ puaa chɔuwaa Sisɛlua wa a sɔŋgɔɔ. Nduyɛ kpaayaa pila puaa Sisɛlua wa ndaa nɔ ni.

Mi Chɛhowa tosa mi mɛŋndaŋ ma huŋ o pioo Kisiɔŋ tau tau. Puaa chɔuwaa Sisɛlua wa ndaa nɔ nyɛm nyaanaŋ suaa naŋndoŋ. Mi hei tosa miŋ hau o loolioo niŋ. Mi Sisɛlua fula o nyɛ ndɔ nyaanaŋndo niŋ, mbo kandu nyaanɔŋndo. Mi Baluaki a puaa nduaa chɔuwa tiu puaa chɔuwaa Sisɛlua wa ba. Kɛ mi Sisɛlua pila nyaanuŋ. Mɛɛ o nyaanuŋ, mbo kɔ vioŋnuŋ o tɛndii wana lanɔ pilɛ niŋ diolaŋ aa Chayɛɛ. Mi chuaa hoo ke ndu mɛɛma nauwaŋ mbo kol, nduyɛ mbo kuumbuu ndu kola bɛndoo choo. Laŋunɔɔ hoo wa o saŋgɛi yɔkɔɔ, okoŋ mbo hiaunuŋ o luaŋ. Mi Chayɛɛ luɛi sɔɔsɔɔ naa o wa ihini wa, mbo kɔ chuku ndu bolleŋ a chiliŋnde. Okoŋ mbo wu pɛ.

Mɛɛ Baluaki wa Sisɛlua nuuviaa, mi Chayɛɛ fula o tɛndii ndɔɔ sondoo, mbo dimul ndu aa: ‘Huŋndɔ o tɛndii nuu niŋ naŋ, mi chɔm num po ŋ cho nuuviaa wo. Mi Baluaki kua o tɛndii ndɔɔ niŋ mbo cha Sisɛlua ihini o vilɛiyo. Okoŋ mi Baluaki nda Diboolua soli chondei le Chɛhowa saŋgalaa, le mɛɛ o tosa mi Isɔluɛiya yam yaamɔɔwaa ndaa yɛ. Wɔsilaŋ 40 okoŋ kɔɔli, Isɔluɛiya wa o kɔl nyulu niŋ.