တၢ်မၤလိ ၃၂
ခိၣ်နၢ်လၢအသီတဂၤ ဒီးပိာ်မုၣ်လၢအသးဒူခံဂၤ
စီၤယိၤၡူကဲခိၣ်ကဲနၢ်လၢ ယဟိဝၤယွၤအပှၤဂီၢ်မုၢ်အဖီခိၣ် အါနံၣ်အါလါဝံၤအလီၢ်ခံ အဝဲသံဝဲဖဲအသးအိၣ် ၁၁၀ နံၣ်န့ၣ်လီၤ. ဖဲစီၤယိၤၡူအိၣ်မူဝဲအခါ ပှၤအံၣ်စရ့လးဖိတဖၣ် ဘူၣ်ထီၣ်ဘါထီၣ်ဝဲယဟိဝၤယွၤလီၤ. ဘၣ်ဆၣ် ဖဲစီၤယိၤၡူသံဝံၤအလီၢ်ခံန့ၣ် ပှၤအံၣ်စရ့လးဖိတဖၣ်စးထီၣ်ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်ဒ်ပှၤကနၤဧၣ်ဖိတဖၣ်အသိးလီၤ. ခီဖျိလၢပှၤအံၣ်စရ့လးဖိတဖၣ် တအိၣ်မူပိာ်ထွဲဝဲဒ်သိးဒီးစီၤယိၤၡူအဃိ ယဟိဝၤယွၤဟ့ၣ်အခွဲးလၢ ပှၤကနၤဧၣ်ဖိအစီၤပၤယၤဘံၣ် ကမၤနၢၤအီၣ်အဝဲသ့ၣ်လီၤ. ဖဲန့ၣ်အဆၢကတီၢ် ပှၤအံၣ်စရ့လးဖိတဖၣ် ဃ့ကညးဝဲလၢ ယဟိဝၤယွၤကမၤစၢၤအဝဲသ့ၣ်လီၤ. ဒီးယဟိဝၤယွၤဃုထၢထီၣ်န့ၢ် ပှၤအံၣ်စရ့လးဖိအခိၣ်နၢ်လၢအသီတဂၤလၢ အမံၤမ့ၢ်ဝဲစီၤဘါရးန့ၣ်လီၤ. စီၤဘါရးမၤစၢၤဝဲ ပှၤအံၣ်စရ့လးဖိတဖၣ်ဒ်သိး အဝဲသ့ၣ်ကဟဲက့ၤဘူၣ်ထီၣ်ဘါထီၣ်က့ၤ ယဟိဝၤယွၤအဂီၢ်လီၤ.
ဝံမုၣ်လၢအမ့ၢ်နီၢ်ဒဘိရၤန့ၣ် မၢပှၤဟဲကိးစီၤဘါရးဆူအအိၣ်လီၤ. နီၢ်ဒဘိရၤ တဲဘၣ်အီၤတၢ်ကစီၣ်လၢ အဟဲလၢယဟိဝၤယွၤအအိၣ် ဒီးတဲဝဲလၢ– ‘ကိးထီၣ်ပှၤပိာ်ခွါအဂၤ ၁၀,၀၀၀ ဒီးလဲၤဒုးတၢ်ဒီး စီၤပၤယၤဘံၣ်အသုးဖိတဖၣ်လၢ ထံကျိကံၡိၣ်တက့ၢ်. ဖဲန့ၣ်န့ၣ် နကဒုးလိာ်သးဒီး စီၤစံစရၤလၢအမ့ၢ် စီၤပၤယၤဘံၣ် အသုးခိၣ်ဖးဒိၣ်တဂၤ ဒီးနကမၤနၢၤအီၤလီၤ.’ စီၤဘါရးတဲဘၣ်နီၢ်ဒဘိရၤလၢ– ‘နမ့ၢ်လဲၤဒီးယၤန့ၣ် ယကလဲၤလီၤ.’ နီၢ်ဒဘိရၤတဲဆၢက့ၤအီၤလၢ– ‘ယကလဲၤဒီးနၤ, ဘၣ်ဆၣ် နဘၣ်သ့ၣ်ညါလၢ နတမၤသံဘၣ်စီၤစံစရၤဘၣ်. ယဟိဝၤယွၤတဲဝဲလၢ ပှၤပိာ်မုၣ်တဂၤကမၤသံအီၤလီၤ.’
နီၢ်ဒဘိရၤလဲၤတၢ်ဒီးစီၤဘါရး ဒီးအသုးဖိတဖၣ်လၢ ကစၢၢ်တၤဘိၢ် ဒ်သိးကဒုးတၢ်အဂီၢ်လီၤ. ဖဲစီၤစံစရၤ နၢ်ဟူဝဲတၢ်ဂ့ၢ်အံၤအခါ အဝဲကိးထီၣ်အသုးဖိတဖၣ် ဒီးကတဲာ်ကတီၤထီၣ်အလ့ၣ်ကဟၣ် ဒီးလဲၤဝဲဆူထံကျိကံၡိၣ် လၢအိၣ်လၢကစၢၢ်အဖီလာ်န့ၣ်လီၤ. နီၢ်ဒဘိရၤတဲဘၣ်စီၤဘါရးလၢ– ‘တနံၤအံၤယဟိဝၤယွၤ ကဟ့ၣ်နၤတၢ်မၤနၢၤလီၤ.’ စီၤဘါရးဒီးအပှၤသုးဖိအဂၤ ၁၀,၀၀၀ လဲၤလီၤလၢ ကစၢၢ်ဖီလာ် ဒ်သိးကဒုးတၢ်ဒီး စီၤစံစရၤအပှၤသုးဖိလၢ အဂံၢ်ဆူၣ်ဘါဆူၣ်တဖၣ်န့ၣ်လီၤ.
ဒီးယဟိဝၤယွၤမၤဒိၣ်ထီၣ်ဝဲ ထံကျိကံၡိၣ်အထံလီၤ. စီၤစံစရၤ အလ့ၣ်ကဟၣ်တဖၣ် အိၣ်ကတာ်ဝဲလၢ ကပံာ်အကျါလီၤ. အဃိ စီၤစံစရၤပာ်တ့ၢ်ကွံာ် အလ့ၣ်ကဟၣ်ဒီး ဃ့ၢ်ထီၣ်ကွံာ်ဝဲလီၤ. စီၤဘါရးဒီးအပှၤသုးဖိ မၤနၢၤဝဲစီၤစံစရၤအသုးဖိတဖၣ် ဘၣ်ဆၣ် စီၤစံစရၤလဲၤဃ့ၢ်ဝဲဖးယံၤ ဒီးလဲၤအိၣ်ခူသူၣ်ဝဲလၢ နီၢ်ယဧ့လးအဒဲပူၤလီၤ. နီၢ်ယဧ့လးဟ့ၣ်ဒုးအီစီၤစံစရၤလၢ တၢ်နုၢ်ထံ ဝံၤဒီးဟ့ၣ်လုးထီၣ်အီၤလၢယၣ်တဘ့ၣ်လီၤ. မ့ၢ်လၢစီၤစံစရၤလီၤဘှံးဒိၣ်မးအဃိ အဝဲမံဘၣ်အသးလီၤ. ဝံၤဒီး နီၢ်ယဧ့လးဟဲဝဲဆူစီၤစံစရၤအအိၣ်ကယီကယီ ဒီးဆဲးဝဲအခိၣ်လၢ နီၣ်ပျၤတဘိ ဒီးစီၤစံစရၤသံဝဲလီၤ.
စီၤဘါရးဟးဃုကွၢ်ဝဲ စီၤစံစရၤလီၤ. နီၢ်ယဧ့လးဟးထီၣ်လၢအဒဲချၢ ဒီးတဲဘၣ်စီၤဘါရးလၢ– ‘ဟဲနုာ်လီၤလၢယဒဲပူၤ ဒီးယကဒုးနဲၣ်နၤလၢ ပှၤလၢနဃုအီၤတဂၤန့ၣ်လီၤ.’ စီၤဘါရးလဲၤနုာ်လီၤဝဲလၢဒဲပူၤ ဒီးထံၣ်ဘၣ်ဝဲလၢ စီၤစံစရၤသံဝဲလံ. စီၤဘါရးဒီးနီၢ်ဒဘိရၤ စံးထီၣ်ပတြၢၤယဟိဝၤယွၤလၢ တၢ်သးဝံၣ်တယုၢ် မ့ၢ်လၢ ပှၤအံၣ်စရ့လးဖိတဖၣ်မၤနၢၤဝဲ အဒုၣ်အဒါတဖၣ်အဃိလီၤ. တၢ်မၤအသးတဖၣ်အံၤဝံၤအလီၢ်ခံ ပှၤအံၣ်စရ့လးဖိတဖၣ် အိၣ်ဘၣ်ဝဲမုာ်မုာ်ခုၣ်ခုၣ်အနံၣ် ၄၀ လီၤ.
“ပိာ်မုၣ်လၢ အကတိၤသြီတၢ်ကစီၣ်န့ၣ် အိၣ်ဂီၢ်မုၢ်ဖးဒိၣ်လီၤ.”—စံးထီၣ်ပတြၢၤ ၆၈:၁၁
