Yosua mvu miayingi kakala mfidi a nkangu a Yave. I bosi, wafwa muna kimbuta kia mvu 110. Vava kakala o moyo, Aneyisaele Yave kaka basambilanga. Kansi vava Yosua kafwa, bayantika sambila e teke, nze una esi Kenani bavanganga. Wau vo Aneyisaele bayambula kunlemvokela, Yave wayambula vo Yabini wa ntinu a Kenani kabamuesa e mpasi. O nkangu wadodokela Yave kimana kabasadisa. Muna kuma kiaki, Yave wabavana mfidi ampa wakala ye nkumbu a Baraki. Yandi wadi sadisa nkangu kimana wavutuka kwa Yave.

Debora wa ngunza ankento wabokelesa Baraki. Wanzayisa e nsangu zatuka kwa Yave vo: ‘Bonga makesa 10.000, nuenda nuana ye makesa ma Yabini kuna nkoko a Kisone. I kûna osundila Sisera wa mfumu a makesa ma Yabini.’ Baraki wavovesa Debora vo: ‘Avo okwenda yame, se ngienda.’ Debora wavova vo: ‘Kwenda nkwenda yaku. Kansi, ke ngeye ko ovonda Sisera. Edi kavovele Yave vo mwan’a nkento okumvonda.’

Debora wayenda kumosi yo Baraki ye makesa mandi kuna Mongo a Tabo mu nuana e vita. Vava Sisera kawá wo,  wakutakesa makesa mandi ye makalu ma vita vana ndimba. Debora wavovesa Baraki vo: ‘Kiaki i lumbu kina o Yave kekusundisa e vita.’ Baraki ye makesa mandi 10.000 bakulumuka mongo mu nuanisa makesa ma Sisera bakala ye nuaninua yangolo.

I bosi, Yave wazadisa nkoko a Kisone ye maza. Makalu mawonso ma Sisera mabatamena muna nteke. Sisera wasisa e kalu diandi yo tina. Baraki ye makesa mandi bavonda makesa ma Sisera, kansi Sisera kafwa ko. Wayenda swekamena muna saba kia nkento mosi wakala ye nkumbu a Yaele. O nkento ndioyu wamvana kimvumina kimana kanua, i bosi wamfukila o nlele. E kesa diadi dia vita wabakama tulu kadi wayoya kakala. I bosi, kuna malembe mawonso, Yaele wabonga o mpalu a saba yo kunsomeka wo muna ntu, ofwidi.

Vava Baraki kavavanga Sisera, Yaele wavaika muna saba kiandi yo kumvovesa vo: ‘Kota mu saba. Ikusonga o muntu ovavanga.’ Vava Baraki kakota muna saba, wawana vo Sisera ofwidi. Baraki yo Debora bayimbila nkunga mu kembela Yave wau kasadisa Aneyisaele mu sunda e mbeni zau. Luvuvamu lwakota muna Isaele mu mvu 40 mialanda.