Nimku abʼqʼi kubʼ nej Josué kywitz aj Israel ex kyim tej qʼiʼntoq 110 abʼqʼi tuʼn. Kukx e ajbʼen aj Israel te Jehová akux itzʼtoq Josué. Noqtzun tuʼnj, tej tkyim e ok ten kʼulel kywitz tilbʼilal ik tzeʼn in bʼanttoq kyuʼn xjal te Canaán. Tuʼnju nya kukx e ajbʼen aj Israel te Jehová, xi tqʼoʼn ambʼil te aj kawil te Canaán aju Jabín tuʼn tok tbʼinchaʼn nya bʼaʼn kyiʼj. Tuʼntzunju e kubʼsan aj Israel twitz Jehová tuʼn tonin kyiʼj. Kyjuʼtzun xi tqʼoʼn Jehová toklen jun akʼaj nejenel aju Barac tbʼi. Oktoq kʼonil kyiʼj qe xjal tuʼn kykʼulen juntl maj te Jehová.

Atoq te Débora jun xuʼj tsanjel Dios. Xi tqʼamaʼn te Barac tuʼn tpon keʼyilte tuʼn t-xi tqʼoʼn tqanil lu otoq tzaj tqʼoʼn Jehová te: «Txiʼya toj tchqʼajlaj aʼ Cisón kyukʼex 10,000 xinaq, moqa ichan, tuʼn tqʼojina kyukʼil tsoldad Jabín. Atztzun kbʼel tiʼj Sísara tuʼna, aju nejenel kye kʼloj soldad lu». Xi ttzaqʼweʼn Barac jlu te Débora: «Jaku chinxe, oʼkx qa ma txiʼya wukʼile». Xi ttzaqʼweʼn Débora: «Chin xeʼle tukʼila, noqtzun tuʼnj, il tiʼj tuʼn tok tbʼiʼna qa nya aya kbʼel bʼyonte Sísara. Ma tzaj tqʼamaʼn Jehová qa tuʼn jun xuʼj kbʼel bʼyoʼn».

Jax Débora twi witz Tabor junx tukʼil Barac ex qe tsoldad tuʼn tbʼaj kybʼinchaʼn kyten tuʼn kyqʼojin. Tej tok tbʼiʼn Sísara jlu, e ok tchmoʼn qe  tkarwaj te qʼojbʼel ex qe kʼloj tsoldad toj chqʼajlaj lu. Xi tqʼamaʼn Débora jlu te Barac: «Ok tzul tqʼoʼn Jehová qe aj qʼoj toj tqʼabʼa jaʼlo». Kuʼtztzun Barac kyukʼex 10,000 tsoldad twi witz tuʼn kyok ten qʼojel kyiʼj tsoldad Sísara aʼyeju nimtoq kyipumal.

Yajxitl, etz mulqʼaj aʼ tuʼn Jehová toj tchqʼajlaj Cisón, ex aʼyeju tkarwaj Sísara in che ajbʼen toj qʼoj e kyaj qʼetj toj xoqʼel. Kuʼtz Sísara toj tkʼuxbʼil ex el oq. Kubʼ kyiʼj tsoldad Sísara tuʼn Barac ex qe tsoldad, noqtzun tuʼnj, el oq Sísara ex okx tewin tibʼ toj ja xbʼalen jatumel najletoq jun xuʼj Jael tbʼi. Xi tqʼoʼn xuʼj lu chʼin lech te ex kubʼ tqʼoʼn jun xbʼalen tibʼaj. Ikʼ jtan aj qʼoj lu tuʼnju otoqxix sikte. Chebʼe chebʼe xi laqʼeʼ Jael ttxlaj ex mintiʼ qʼajt, kuxtzun tjubʼen jun tzeʼ t-xe t-ẍkyin ex bʼiʼx kyim.

Tej tikʼ chʼintl ambʼil, pon Barac jyolte Sísara, ex etz Jael toj tja xbʼalen ex xi tqʼamaʼn jlu te: «Ku toktza, ex kxel nyekʼine teya aju xjal in jyona tiʼj». Okx Barac toj ja xbʼalen ex lutoq Sísara bʼaqle twitz txʼotxʼ, otoq kyim. Xitzun kybʼitzen Barac ex Débora jun bʼitz te nimsabʼil tbʼi Jehová tuʼnju otoq tzʼonin kyiʼj tuʼn tkubʼ kyiʼj aj qʼoj. E anqʼintl aj Israel toj mojbʼabʼil kyoj qeju 40 abʼqʼi e ikʼ.