Pa cisila ca kutungulula antu yakwe Yeova pa myaka ingi, Yoswa wafwile ala ali ni myaka 110. Lyonsi lino wali nu umi, Aina Izlaeli yapepanga Yeova. Nomba lino Yoswa wafwile, yataandike ukupepa ivilubi, wakwe vino Aina Kenani yacitanga. Pa mulandu wakuti Aina Izlaeli yatiile kupepa Yeova, walenzile ukuti umwene wa mu Kenani uwi zina ilyakuti Yabini alenge ivintu viyatalile mu umi. Antu yaapaapasile kuli Yeova ukuti ayazwe. Fwandi Yeova wayapeezile Balaki intunguluzi ipya, iyali nu kwazwa antu kutandika kupepa Yeova nupya.

Debola kasesema umwanaci, watumile aakuyaama Balaki. Walondanga ukumuneena mazwi aafumile kuli Yeova aakuti: ‘Senda aonsi 10,000 nu kuyakomenkanya asilika yakwe Yabini ku luzi lwa Kisyoni. Kuuku akuno ulacimvya Sisela, umukalamba wa yasilika yakwe Yabini.’ Balaki waneenyile Debola ati: ‘Ndapita ndi cakuti twapita pamwi nawe.’ Nawe watile: ‘Ndapita pamwi nawe. Nomba umanye ukuti asi wewe ulakoma Sisela. Yeova watalanda ukuti umwanaci aliwe alamukoma.’

Debola waile pamwi na Balaki na asilika yakwe uku Mwamba wa Tabo pakuti yaipekanye ukulwa. Lino Sisela uvwile vii,  wakolonganike maceleta ya nkondo na asilika yakwe nu kuya umunyika. Debola waneenyile Balaki ati: ‘Ilelo Yeova amalenga ukuti ucimvye.’ Balaki na onsi 10,000 yatentemwike umwamba pakuti yakakomenkanye asilika yakwe Sisela aa maka.

Yeova walenzile ukuti uluzi lwa Kisyoni luzule manzi. Maceleta yakwe Sisela yafilwanga ukupita pa mulandu na matipa. Sisela wasile iceleta lyakwe atandika ukusimula. Balaki na asilika yakwe yacimvizye asilika yakwe Sisela, lelo Sisela wene utwike. Nupya waile afisama umwi tenti lya mwanaci uwi zina lya kuti Yaeli. Umwanaci wii wapezile Sisela umukaka amuvimba ni cakuvimbala. Sisela watonsile icakuti wakaswile. Lyene umwanaci watundeliile Sisela, atoola ulupopo lwa kwi tenti amupopelela mu mutwe. Ali vino Sisela wafwile.

Balaki waile mu kulonda Sisela. Yaeli wafumile umwi tenti nupya wamunenyile ati: ‘Ingila. Nimakulanga umonsi wino ukulonda.’ Balaki wingiile umwi tenti nupya wazanyile Sisela atafwa. Balaki na Debola yalumbanyizye Yeova umu lwimbo pa mulandu wakuti walenzile Aina Izlaeli yacimvye alwani yao. Pa myaka 40 iyalondelilepo, Aina Izlaeli yali nu mutende.