Elõñ iiõ in an kar Joshua tõl armej ro an Jeova, im ke ear 110 an iiõ ear mej. Ilo iien ko ear mour, RiIsrael ro rar kabuñ ñan Jeova. Ak ãlikin an kar Joshua mej, rar l̦oor RiKenan ro im jino kabuñ ñan ekjab ko. Kõnke RiIsrael rein rar jab pokake wõt Jeova, Jeova ear kõtl̦o̦k bwe juon kiiñ etan Jebin jãn Kenan en kaeñtaan er. Armej ro rar akwel̦ap ñan Jeova bwe en jipañ er. Innem Jeova ear kããlõt juon aer rũtõl ekããl etan Berak. Berak enaaj kar jipañ armej rein bwe ren bar kabuñ ñan Jeova.

Debora, juon kõrã me ear bõk jerbalin rũkanaan, ear kũrtok Berak bwe en itok ñan ippãn kõnke ewõr juon ennaan ñane jãn Jeova. Jeova ear ba: ‘Kwõn bõk 10,000 em̦m̦aan ippam̦, im kom̦win etal im iioon rũttarin̦ae ro an Jebin ilo reba eo ilo Kaishon. Kwõnaaj anjo̦ ioon Sisera, eo ej tõl rũttarin̦ae ro an Jebin.’ Innem Berak ear ba ñan Debora: ‘Inaaj etal el̦aññe kwõnaaj itok ippatok.’ Im Debora ear ba: ‘Inaaj iwõj ippam̦. Ak ejjab kwe eo kwõnaaj m̦an Sisera bwe en mej. Em̦õj an Jeova ba bwe juon kõrã enaaj m̦ane.’

Debora ear etal ippãn Berak im rũttarin̦ae ro an ñan ioon Tol̦ Tebor im  rar kõppojak ñan aer tarin̦ae. Ke Sisera ear roñ kõn men in, ear bõkl̦o̦k aolep rũttarin̦ae ro an im jariot ko waer ñan tulal̦in tol̦ in. Debora ear ba ñan Berak: ‘Rainin Jeova enaaj kõm̦m̦an bwe kwõn bõk anjo̦.’ Innem Berak im 10,000 em̦m̦aan ro ippãn rar wanlal̦l̦o̦k jãn ioon tol̦ eo bwe ren iioon kumi in tarin̦ae eo ekajoor an Sisera.

Jeova ear kõm̦m̦an bwe en lukkuun ibwij reba eo ilo Kaishon. Kõn men in, jariot ko waan Sisera rar jab maroñ ettõr ilo pedkat ko. Innem Sisera ear likũt jariot eo waan im ko. Berak im rũttarin̦ae ro an rar anjo̦ ioon kumi in rũttarin̦ae eo an Sisera. Ilo iien in, em̦õj an Sisera ko im kũttiliek ilo em̦ nuknuk eo an juon kõrã etan Jeel. Jeel ear lel̦o̦k limen milik im ko̦o̦joje. Kõn an kar Sisera lukkuun m̦õk, ear kajju kiki im ettoñ. Ke ej kiki, Jeel ear ajjãdikdikl̦o̦k im dilaiki bõran kõn juon dila in em̦ nuknuk im emej.

Ke Berak ear itok im pukote Sisera, Jeel ear diwõj nabõjl̦o̦k jãn lowaan em̦ nuknuk eo im ear ba: ‘Kwõn itok. Inaaj kwal̦o̦k ñan eok armej eo kwõj pukote.’ Berak ear del̦o̦ñl̦o̦k im ear loe bwe Sisera emej. Tokãlik, Berak im Debora rar nõbar Jeova kõn juon al kõn an kar jipañ RiIsrael ro bwe ren bõk anjo̦. Innem jãn iien in, ear wõr aenõm̦m̦an ilo Israel ium̦win 40 iiõ.