Josué kinyakanki Jehová itekipanojkauaj miak xiuitl uan mijki kema kipixtoya 110 xiuitl. Kema Josué itstoya, israeleuanij kiueyichiuayayaj Jehová, uan kema mijki, pejkej kinueyichiuaj teotsitsij kej canaáneuanij. Israeleuanij ayokmo kineltokakej Jehová, yeka ya kikajki ma kintlaijiyouilti se tlanauatijketl canaánejketl katli motokaxtiyaya Jabín. Kema israeleuanij tlaijiyouijtoyaj, miakpa kiiljuijkej Jehová ma kinpaleui. Yeka Jehová kitlapejpenik se yankuik tlayakanketl tlen motokaxtiyaya Barac. Ya kinpaleuiskia israeleuanij sampa ma kitekipanokaj Jehová.

Débora, se siuatl katli eliyaya tlajtolpanextijketl, kinotski Barac uan kiiljuik tlen Jehová kiiljuijtoya: “Xia ipan atlajtli Cisón ininuaya diez mil tlakamej katli kinteuisej Jabín itlateuijkauaj. Uan nopaya tijtlanis Sísara, katli kinyakana Jabín itlateuijkauaj”. Barac kinankilik Débora: “Tlaj tias nouaya, kena nias”. Ya kiiljuik: “Maske nias mouaya, ta amo tijmiktis Sísara, pampa Jehová kiijtojtok se siuatl kimiktis”.

Débora iuaya Barac uan itlateuijkauaj yajkej ipan tepetl Tabor, nopaya mokualchijchiuaskiaj pampa nechka tlateuiskiaj. Kema Sísara kimatki nopaya itstoyaj, kinsentilik itlateuijkauaj ipan tlamayamitl, uan nojkia  kisentilik nopa carros tlen ika tlateuiskiaj. Débora kiiljuik Barac: “Ipan ni tonali Jehová mitspaleuis xikintlani mokualankaitakauaj”. Uajka Barac uan nopa diez mil tlakamej temokej kampa itstoyaj Sísara itlateuijkauaj.

Jehová kichijki nopa atlajtli Cisón ma moxoyaua, uan nopa carros tlen ika tlateuiyayaj mosokitojkej. Sísara temok tlen icarro uan mochololtik. Maske Barac uan itlateuijkauaj kintlankej Sísara itlateuijkauaj, Sísara cholok uan motlatito ipan se yoyonkali kampa itstoya se siuatl katli motokaxtiyaya Jael. Jael kimakak ma kiiji se kentsi leche uan kipijki ika se tlakemitl. Sísara nimantsi kochki pampa tlauel siajtoya. Uajka Jael ichtakatsi kinechkauik uan kikechilik se kuauitl tlatentili ipan itsonteko, uan Sísara mijki.

Teipa, asito Barac pampa kitemojtinemiyaya Sísara. Uajka Jael kiski uan kiiljuik: “Xipano, nimitsnextilis kanke itstok katli tijtemoua”. Kema Barac kalajki, kiitak Sísara miktoya. Teipa, Barac uan Débora kiuikatijkej Jehová pampa kinpaleuijtoya ma kintlanikaj ininkualankaitakauaj. Israeleuanij kipixkej tlaseuilistli 40 xiuitl.