Yosuwa amanle waahoolela achu a Yehova mu iyaakha sincipale, owo aakhwa arino iyaakha 110. Elukuluku aakhanleiye, Aisarayeli yaanamulapela Yehova. Nyenya vaavaa owo aakhwileiye, Aisarayeli yaalapela soophwaniherya sa achu o Kanani yaapankaaya. Nthowa na Aisarayeli omuhiya Yehova, owo aahaaveleela mmatani wa mwene o Kanani iichaniwa Yapini wi aahooxeke. Achu yaamveka Yehova wi aakhaviherye. Yehova aahaavaha muhooleli muvyaani Paraki. Owo aahaakhaviherya achu omukookela Yehova.

Mulipa a miririmu a mwaamuthiyana Tepora, aamwiichana Paraki. Aamuleela michaka soorweela wa Yehova: ‘Wakuxe alopwana macikhwi khumi. Waphiya o muhice Kisoni kinamooruuhela Sisera mutokweene a akhoco a Yapini.’ Paraki aamwaakhula: ‘Wayawo ni miyaano, miyaano tho kinamuyawo.’ Tepora aaloca: ‘Kinamoochara. Nto ovuwa wa ekhoco hokhala wawaa. Ntakhara tahi yoowe oni omwiiphe Sisera. Apwiya anamumveleela Sisera mmatani mwa muthiyana.’

Tepora aamuchara Paraki ni akhoco awe eyaaka omwaako Tapor wi yiirehererye. Mwawaakuveya Sisera aahiiwa sa yeeyo, owo aacimula ni akhoco awe wi aathikirerye. Tepora aamuleela Paraki ariki: ‘Olelo ti nihiku  Apwiya anamvelelaaya Sisera mmatani mwaa.’ Paraki ni achu awe 10.000 yaakhuruwela omwaako wi ekumane ni akhoco a Sisera.

Yehova aaheeriha wi muhice Kisoni osareye maahi. Ikaaro sa Sisera saanapwata vancokwani. Sisera aacupha va ekaaro awe aapacerya ochawa. Paraki ni akhoco awe yaahaavootha akhoco a Sisera, nyenya owo aachawa akophola, nave achawaka aahoona muxakala wa muthiyana iichaniwa Yayeli. Yayeli aamwaakhela amvaha yoowurya nave aamukhuneela ni manta. Nakhoco ole aakona. Yayeli aamwitela akhomela muru awe vachayani nave aamwiipha.

Paraki amwaavyaka Sisera, Yayeli aaheemela vaate wa muxakala awe nave aaloca: ‘Nkarwaa kinanwooniha mulopwana onamwaavyaawe.’ Paraki aavolowa nave aamoona Sisera aari ookhweene. Paraki ni Tepora yaamuthamala Yehova ni macipo nthowa na Aisarayeli waavootha amwiicani aya. Mu iyaakha 40, Aisarayeli yaakhalano murecele.