Jáshowa éí Ízrel dineʼé yá sizı̨́įgo ląʼí nááhai, áádóó 110 honááhaigo dajiztsą́. Tʼah jiináago Ízrel dineʼé Jiihóvah deidósin ńtʼééʼ, ndi dajiztsą́ bikéédóó éí Kéínan dineʼé nahalingo edaʼalyaii yichʼįʼ nidahałáago yaa nídiikai. Doo akʼeh dahojíłʼínígíí biniinaa Kéínan binaatʼáanii Jéíbin hachʼįʼ nahwiiłnáago hoolzhish. Nihíká anilyeed dajiníigo Jiihóvah nídajookąąh. Hodiiztsʼą́ąʼgo hooʼish dooleełígíí Bérak wolyéego há niiníłtı̨́. Bérak éí háká adoolwołgo Jiihóvah baa nináhizhdookah.

Déborah éí Jiihóvah yá halneʼii nilı̨́. Jiihóvah ánínígíí Bérak bił chʼízhníʼą́: ‘Kíshangi tooh nilı̨́įgi hastóí 10,000 ánéelą́ąʼgo Jéíbin bisiláo bidááh dííʼish. Ákwii Jéíbin bisiláo alą́ąjįʼ sizínígíí diyííłhééł, éí Sísera wolyé.ʼ Bérak éí Déborah ábijiní: ‘Ákǫ́ǫ́ deeshááł, ákondi shił díníʼáazhgo tʼéiyá.ʼ Déborah ájíní: ‘Ákǫ́ǫ́ nił deeshʼash, ákondi ni éí doo Sísera diyííłhéeł da, díí éí asdzánígo bidiyoołhééł.ʼ

Áko Déborah éí Bérak dóó bisiláo bił Dził Téíbor bighą́ą́ʼgóó jíkai, áádę́ę́ʼ Sísera bikʼiizhdoojah biniyé. Sísera díí yaa  hodiiztsʼą́ąʼgo, dził bitsı̨́įdi bitsinaabąąs dóó bisiláo áłah áyiilaa. Déborah éí Bérak ábijiní: ‘Díí jı̨́ Jiihóvah níká eelwodgo Sísera bikʼeh didíídleeł.ʼ Bérak dóó hastóí 10,000 ánéelą́ʼígíí bił dziłghą́ą́ʼdę́ę́ʼ Sísera bisiláo bikʼi jiijééʼ.

Jiihóvah éí Kíshan tooh nilínígíí yiyííłąąd. Áko Sísera bitsinaabąąs hashtłʼish biih yiltsʼidgo tʼóó yitsʼą́ąjįʼ dah diilwod. Sísera dóó bisiláo bikʼeh dazhdeesdlı̨́ı̨́ʼ, ákondi Sísera éí yóó anííchą́ą́ʼ. Asdzání Jéíyel wolyéego biníbaal biiʼ nízhdínéestʼı̨́ı̨́ʼ. Sísera chʼééh jideeyá, áko asdzání abeʼ łaʼ hainíką́ áádóó naa iʼjííłhaazh. Ajiłhoshgo, Jéíyel éí níbaal bił anídaalkałi yee hatsiitsʼiin yił iʼííłkaal, áko dajiztsą́.

Bérak éí Sísera hazhnitá. Jéíyel éí níbaal biiʼdę́ę́ʼ chʼízhníyáago: ‘Hágo, hastiin hanítáhígíí kóneʼ sitı̨́,’ hodííniid. Níbaal biiʼ jidééʼı̨́įʼgo Sísera daaztsą́ągo sitı̨́įgo jiiłtsą́. Jiihóvah háká eelwodgo hweʼanaʼí bikʼeh dazhdeesdlı̨́ı̨́ʼ. Déborah dóó Bérak éí Jiihóvah yaa haniihgo hóótáál. Ízrel dineʼé éí bił hodéesyéelgo dízdiin nááhai.