Josue wahongolela ovanthu va Jeova omanima omanyingi iya ankhi etyi ena omanima 110. Etyi Josue ena omuenyo ova Isilayeli ankho vafenda Jeova. Mahi etyi Josue ankhia, ova Isilayeli avahimbika okufenda ovilolo ngetyi ankho tyilinga ova Kanaa. Mokonda ova Isilayeli kavatuaileko okumutavela, Jeova ayeke ohamba yo va Kanaa itiwa o Jabim ivemonese ononkhumbi. Ovanthu avaiti ku Jeova opo evekuateseko. Jeova eveavela onkhalamutwe omphe, itiwa o Barake. Barake ankho upondola okuvekuatesako vakondoke ku Jeova.

Omukai umwe omuuli utiwa Debora, atumu Barake onondaka mba Jeova mbati: ‘Taindya ovalume 10.000, amukelivasa pondongi Kisom nomafualali ohamba Jabim. Opo mphangu oyo mamufindi Sisera, onkhalamutwe yomafualali a Jabim.’ Barake apopila Debora okuti: ‘Ame mandyiende vala, inkha nove wenda na ame.’ Debora ati: ‘Ame mandyiende noove. Mahi noñgonoka okuti, haveko moipaa Sisera. Jeova wapopia okuti maipawa nomukai.’

Debora na Barake nomafualali avaende Komphunda Tabole opo velipongiye pala ovilwa. Etyi Sisera etyiiva, amaneka omatuku-tuku  ae ovilwa tupu amenekesa omafualali avakala melongi. Debora apopila Barake okuti: ‘Hono onthiki Jeova memukuatesako okufinda.’ Barake no valume 10.000 avalauka komphunda opo vahoyene no mafualali a Sisera.

Jeova alingi ehuviso, ondongi Kisom ayeeta aihandyaila kondye iya omatuku-tuku ovita a Sisera aanyena monthata. Sisera atuluka ketuku-tuku akahateka. Balake nomafualali ae avaipaa omafualali a Sisera, mahi Sisera ahupu! Sisera Akaholama mekaka lio mukai umwe utiwa o Jael. Jael emuavela omahini, Sisera apuene etyi alala emuhiki omanda. Jael eliyombeleka emupapela omphehe momutwe iya ankhi.

Barake eya okuovola Sisera. Jael alupuka mekaka liae emupopila okuti: ‘Nyingila, endyu utale omulume ukahi nokuovola.’ Barake anyingila mekaka avasi Sisera wankhia. Barake na Debora avankhimaneka Jeova notyiimbo mokonda wakuatesako ova Isilayeli okufinda onondyale. Mokueenda kuomanima 40 ova Isilayeli avakala nombembwa.