Josué pa kʼi taq junabʼ xukʼam ubʼe ri utinamit ri Jehová tekʼuriʼ xkamik are chiʼ kʼo 110 ujunabʼ. Are chiʼ kʼasal na ri Josué ri israelitas xkiqʼijilaj ri Jehová. Are kʼu chiʼ xkamik, xkimaj kiqʼijilaxik e tyox junam che kkibʼan ri winaq re Canaán. Rumal che ri israelitas xkinimaj ta chi ri Jehová, areʼ xuyaʼo che ri ajawinel cananeo ubʼiʼ Jabín xubʼan kʼax chke. Tekʼuriʼ, ri tinamit sibʼalaj xutaʼ che ri Jehová che ketoʼ rumal. Rumal laʼ Jehová xuya jun kʼakʼ ajkʼamal bʼe ubʼiʼ Barac. Areʼ keʼutoʼ ri winaq rech jumul chik kkiqʼijilaj ri Jehová.

Jun ajqʼaxal tzij ixoq ubʼiʼ Débora xutaq usikʼixik ri Barac rech kuya ubʼixik ri e tzij riʼ che petinaq rukʼ ri Jehová: «Cheʼakʼamaʼ bʼi 10.000 achijabʼ jachiʼ kʼo wi ri nimaʼ Cisón rech kixchʼojin kukʼ ri rajchʼojabʼ ri Jabín. Chilaʼ kachʼak ri Sísara, ri ajkʼamal bʼe kech ri ajchʼojabʼ riʼ». Barac xubʼij che ri Débora: «Kinbʼek we at katbʼe wukʼ». Areʼ xubʼij che: «Kinbʼe awukʼ, are rajawaxik kawetaʼmaj che at ta riʼ ri katkamisan ri Sísara. Jehová ubʼim che are jun ixoq ri kkamisanik».

Débora xpaqiʼ pa ri juyubʼ Tabor rukʼ ri Barac xuqujeʼ ri ajchʼojabʼ rech kechʼojinik. Are chiʼ Sísara xuto, xumulij ri e chʼichʼ re chʼoj xuqujeʼ ri e  uwinaq pa ri liʼanik. Débora xubʼij che Barac: «Kimik Jehová kubʼano che katchʼakanik». Rumal laʼ ri Barac xuqujeʼ ri 10.000 achijabʼ xeqaj lo pa ri juyubʼ rech kechʼojin rukʼ ri nimalaj ejército re Sísara.

Tekʼuriʼ, Jehová xubʼano che ri jaʼ re Cisón xel lo pa ri ukʼolbʼal, ri e chʼichʼ re chʼoj re Sísara xechʼapeʼ pa ri xaqʼoʼl. Sísara xqaj pa ri uchʼichʼ tekʼuriʼ xutij bʼi anim. Barac xuqujeʼ ri e rajchʼojabʼ xkichʼak ri ejército rech Sísara, are kʼu Sísara xanimaj bʼi xuqujeʼ xukʼuʼ ribʼ pa ri ja bʼanom che atzʼyaq jachiʼ kʼo wi jun ixoq ubʼiʼ Jael. Areʼ xuya jubʼiqʼ leche xuqujeʼ xuchʼuq che jun atzʼyaq. Ri ajchʼoj xwarik rumal che sibʼalaj kosinaq. Tekʼuriʼ Jael nojim xqebʼ rukʼ, sibʼalaj nojim, xubʼajij jun cheʼ pa ujolom, rumal laʼ xkamik.

Qʼaxinaq chi ri tiempo, xopan ri Barac tajin kutzukuj ri Sísara. Jael xel lo pa ri rachoch, xubʼij che: «Chatok bʼi kinkʼut chawach ri achi che tajin katzukuj». Barac xok bʼi pa ri ja bʼanom che atzʼyaq, xril ri Sísara kaminaq chik. Rumal laʼ, Barac xuqujeʼ Débora xkibʼixoj jun bʼixonem rech kkiya uqʼij ri Jehová rumal che xubʼano che xekichʼak ri kikʼulel. Ri winaq re Israel xekʼojiʼ pa jamaril 40 junabʼ.