Josueqa askha watakunan Diospa llaqtanta umalliran, 110 watanpitaq wañupuran. Josuepa kausasqan tiempopiqa Jehová Diostan serviranku. Wañupusqan qhepamanmi ichaqa waj dioskunata adoraranku Canaán runakuna jina. Chaymi Diosqa permitiran Canaán llaqtamanta rey Jabín paykunata sufrichinanpaq. Jinan Israel runakunaqa Diosta valekuranku yanapananpaq. Chaymi Diosqa juj mosoq umalliqta ajllaran, sutinmi karan Barac. Paymi Israel runakunata yanaparan Jehová Diosta jujmanta servinankupaq.

Profetisa Deboran Baracman willaran Diospa nisqanta, niranmi: “Cisón mayuta 10.000 soldadokunawan riy Jabinpa ejercitonwan maqanakunaykipaq. Chaypin atipanki Sisarata, paymi umallishan Jabinpa soldadonkunata”, nispa. Baractaq niran: “Noqawan riqtiykiqa risaqmi”, nispa. Deborataq niran: “Risaqmi, ichaqa manan qanchu Sisarataqa wañuchinki aswanpas juj warmi”, nispa.

Deboraqa Baracwan soldadokunawan kuskan Tabor orqoman wicharan maqanakunankupaq. Chayta yachaspan Sisaraqa soldadokunata carretakunatawan juñuspa maqanakunanpaq riran. Deboran Baracta niran: “Jehová Diosmi atipachisunki”, nispa.  Jinan Baracqa 10.000 soldadonkunawan orqomanta urayamuspa Sisaraq soldadonkunawan maqanakuran.

Chay qhepamanmi Diosqa Cisón mayuta askhayachispa unuta lloqsirachiran, jinan Sisaraq carretankunaqa t’urupi mana puriyta atirankuchu. Chaymi Sisaraqa carretanmanta uraykuspa ayqekuran. Baracpa ejercitonmi Sisaraq ejercitonta atiparan, Sisaran ichaqa ayqekuspa Jaelpa karpanman chayaran chaypi pakakunanpaq. Chay warmin lecheta qospa juj mantawan tapaykuran. Sisaraqa sinchi sayk’usqa kasqanrayku puñurapuran. Jinan Jaelqa susigollawan qayllaykuspa juj estacawan umanpi clavaspa wañurachiran.

Baracqa Sisarata maskhaspan Jaelpa karpanman chayaran. Jaeltaq niran: “Jaykumuy, qhawachisqaykin maskhasqayki runata”, nispa. Jinan Baracqa rikuran Sisarata pampapi wañusqata. Diosmi Israel llaqtata yanaparan enemigonkunata atipanankupaq. Chaymi Baracpas Deborapas Diosta alabaranku takispanku. Chay qhepamanmi Israel runakunaqa 40 wata thajpi kausaranku.