О Исус Навин водинѓа е Јеховаскере народо бут берша хем муло кеда сине ле 110 берш. Са џикоте ов сине џивдо, о Израелција служинена сине е Јеховаске. Ама пало лескоро мерибе, почминѓе те служинен е идоленге, сар со керена сине о Ханаанција. Адалеске со о Израелција на шунена сине е Јехова, ов мукхља о цари таро Ханаан, со викинела пе сине Јавин, те керел ленге бут лошна буќа. О мануша молинена сине е Јехова те поможинел лен. О Јехова шунѓа ленгере молитве хем денѓа лен нево водачи, о Варак. Ов ваљани сине те поможинел е народоске палем те служинен е Јеховаске.

Јекх диве, и пророчица, и Девора викинѓа е Варако. Ој вакерѓа леске порака таро Јехова: „Ле туја 10.000 мануша хем икљов англи е Јавинескири војска ки река Кисон. Адари ка победине е Сисара, о заповеднико е Јавинескере војскакоро“. О Варак вакерѓа е Девораке: „Ка џав само ако ту авеа манцар“. Ој вакерѓа леске: „Ка авав. Ама, те џане нане ту те мударе е Сисара. О Јехова вакерѓа манге кај ка мударел ле џувли“.

И Девора гели е Варакоја хем лескере војскаја ки планина Тавор те спреминен пе баши војна. Само со шунѓа о Сисара башо  адава, кхединѓа ки долина пе манушен хем о кочие баши војна. И Девора вакерѓа е Варакоске: „Авдиве о Јехова ка керел те победине“. О Варак хем лескере 10.000 мануша, хулиле тари планина те икљон англи силно војска е Сисараскири.

Тегани о Јехова керѓа о пани тари река Кисон те поплавинел и долина. Адава тхан уло добором чикало со о воена кочие е Сисараскере заглавинѓе. Тегани о Сисара иклило тари пли кочија хем почминѓа те нашел. О Варак хем лескири војска успејнѓе те побединен е Сисараскере војска, ама о Сисара нашља. Тегани гаравѓа пе ко шатори јекхе џувљакоро, со викинела пе сине Јаила. Ој денѓа ле те пиел тхуд хем учхарѓа ле ќебаја. Ов сине бут уморно хем засуќа. Тегани и Јаила похари гели узи лесте хем е клинеа таро шатори мударѓа ле.

О Варак ало те родел е Сисара. И Јаила иклили таро шатори хем вакерѓа: „Кхув андре. Ка сикавав туке е мануше со родеа ле“. Кеда о Варак кхувѓа андре дикхља е Сисара сар пашљола муло. Тегани, о Варак хем и Девора фалинѓе е Јехова аѓаар со гиљавѓе леске гили адалеске со поможинѓа е Израелцонге те побединен пле душманен. Пало адава, о Израелција сине лен мир 40 берш.